Amaravati, Jymmang:
Ka jylla Andhra Pradesh ka nang pynkylla stet ïa ki tnum ïing jong ka sha ki jaka pynmih bording, ha kaba palat 23,000 tylli ki longïing mynta ki la lah ban pynmih ïa la ka jong ka bording hapoh ka PM Surya Ghar Muft Bijli Yojana.
Ka skhim ba kongsan jong ka sorkar pdeng, kaba thmu ban kyntiew ïa ka bording kaba khuid bad kaba remdor, la pyntreikam ha kylleng ka jylla da ki lai tylli ki kompeni sam bording – ka AP Central Power Distribution Corporation Limited (APPCPDCL), ka AP Southern Power Distribution Company Limited (APPSPDCL), bad ka kompeni sam bording jong ka thaiñ Mihngi.
Haduh mynta, palat 12 lak tylli ki aplikeshon ki la tuid, hynrei tang 22,822 tylli ki jingpynrung bording sngi ha tnum ïing la pyndep, kaba la ai palat 79,000 kW ïa ka bording sngi sha ka Grid. Ka APEPDCL ka dei kaba lamkhmat ha ka jingkheiñ da kaba buh 10,584 tylli, bud sa ka APCPDCL da 7,984 tylli bad ka APSPDCL da 4,254 tylli.
Haba batai kumno kane ka skhim ka treikam, u Deputy Executive Engineer ka APCPDCL u Ratnakumari u la ong ba ïa ka bording ba la pynmih lyngba ka Solar Rooftop Photovoltaic (SRTPV) la pynrung beit beit sha ka Grid. Ka DISCOM ka pynbeit ïa kane katkum ka bai bording jong u nongpyndonkam. “Kum ka nuksa, lada ka Solar System ka pynmih bording kaba shongdor T.80 bad ka jingpyndonkam jong ka longïing baroh kawei ka long T.100, u nongpyndonkam u siew tang T.20,” ka la ong.
Ban ïoh ïa kane ka jingïarap donkam ym duna ïa ka 100 phut sawdong ka jaka halor tnum, bad ki jaka sah ruh ki lah ban Apply.
Ka skhim ka ai jingïarap haduh 60% – T.30,000 na ka bynta ki system 1 kW, T.60,000 na ka bynta 2 kW, bad T.78,000 na ka bynta 3 kW, ha kaba ka jinglut kaba ju buh ka long naduh T.60,000 haduh T.80,000.
Haba pynshai halor ka jingïapher kaba khraw hapdeng ki aplikeshon bad ki jingpyndait, ka Ratnakumari ka la ong, ka Sorkar Andhra Pradesh ka la pynïar shuh shuh ïa kane ka skhim ban kynthup ïa ki 20 lak ngut ki nongïoh jingmyntoi na ki Scheduled Caste bad Scheduled Tribe hapoh ka Jagjeevan Jyothi Yojana, da kaba ai bording khlem jingsiew ïa ki.
“Ki longïing SC bad ST kiba dei hok ki la dep ban pynrung kyrteng, bad la thmu ban buh Tender bun tylli ban pynsted ïa ka jingïaid shaphrang,” ka la bynrap. Ban aplai, ki nongpyndonkam ki dei ban pynrung kyrteng ha ka National Portal na ka bynta ka Rooftop Solar ryngkat bad ka DISCOM bad Customer Number jong ki. Shisien ba la mynjur ïa ka jinglah ban leh, ki jied ïa u nongdie uba la pynrung kyrteng, ki pyndep ïa ka jingpynrung, bad ki aplai ïa u Net Meter. Hadien ba la jurip, la ai ïa ka kot pynshisha ba la pyntreikam, bad ïa ka jingïarap la pynpoi beit sha ka Bank Account jong ki hapoh 30 sngi.
Da kaba ithuh ba ka jingpynsngewthuh paidbah ka dang long ka jingeh kaba khraw, khamtam ha ki jaka nongkyndong, ka sorkar jylla ka la bthah ïa ki bor synshar distrik ban pynlong ïa ki jingpynsngewthuh paidbah shaphang ka sngi bad ki jinglehniam Mela halor ki tnum ïing.
Ki heh sorkar ki don ka jingkyrmen ba da ka jingpynbna kaba kham khlaiñ bad ka jingpyntreikam kaba heh, ka AP ka lah ban mih kum ka nongïalam ha ka ri ha ka jingpynmih bording na ka sngi kaba la pynïaid da ki bor sorkar – ban pynshai ïa ki ïing ym tang da ka bording, hynrei da ka jinglah ban shaniah halade bad ka jingpynneh pynsah.
