Ka long kaba pynlyngngoh ban ïohi ba ka rep ka riang ka kamai kajih ka la nanghiar ha ngi ki Khasi. Kane nga shu ai nuksa bad pynïasyriem bad ha ka por ki Kmie ki Kpa ki dang im bad mynta ha ngi ki khun ki ksiew pateng kiba mih bujli ïa ki kmie ki kpa kam long shuh kum ha ka por jong ki.
Ha ka por ki kmie ki kpa ka rep ka riang ka man bha bad dang ïohi bun ban mih bha. Katba mynta ha ki khun ki ksiew ka rap ka riang ka la hiar bad ka kamai kajih ruh ka la hiar arsut. Ngim tip kaei ka daw ba pynlong ïa ka jaitbynriew jongngi ban jia kumne. Kiwei ki jaitbynriew ki nangkiew katba nang mih ki sngi ki ïa. Lada ka long kumne ym slem shuh ka jaitbynriew jongngi kan sa ïa kynduh shibun ki jingeh ha ki por ban sa wan. Tang ki surok kali te ki la bun bha mynta. Ha ki por kham mynshuwa ym don surok khamtam ha ki jaka nongkyndong ka ri.
Ki briew ki shu ïaid da ka kjat khlem salia wat lada ka jngai katno katno ruh ha ka leit ka wan. Hato kane ka jingtroiñ ka rep ka riang, ka kamai kajih ka dei na ka dustur ka riti kaba pynhiar arsut kumne ne dei na ka jingjaituh ban rep ban riang mynta. Ne dei na ka jingleit skul bun kim treh shuh ban rep ban riang kum ki kmie ki kpa. Ki bun ki daw lada ngi wad bniah ïa ki daw ba nanghiar ka rep ka riang bad ka kamai kajih ha ka jaitbynriew jongngi.
Hato ka jinghiar ka rep ka riang bad ka kamai kajih ka dei na ka jingkylla ka Mei mariang ne ka dei ka jingbym bud pateng ïa ka jinghikai jong ki kmie ki kpa. Bad ym tang ha ka rep ka riang, ka kamai kajih hynrei kiwei kiwei ki kam ruh ki la hiar bad nangtroiñ katba nangmih ki sngi ki ïa. Kane kam dei ka jingkylla ka mariang hynrei ka dei ka jingleh stad jongngi hi ki briew, ka pynhiar dor ïa ka rep ka riang bad ka kamai kajih jongngi ki briew.
C. B. Iawphniaw
