U Nongsaiñ Hima 1965
Uno uno u briew ne kano kano ka hima kaba dang don ka jingtipbriew bad ka jingsngewthuh, kin nym jin da ia kwah ïa ka jingkulmar, ki jingïapyniap, kum ban shu ong noh ban pynkhie bad ïaleh thma. Hynrei lada don mano mano ba ktah ym lah ban shu shah jem bad dei tang ka jingpyneh ka ban pyntieng ïa uta uba ktah kti nyngkong. Kumjuh ruh hangne ha Ri India jong ngi, mynta la 17 snem ka jinglaitluid, ka Ri kaba m arjan bad ngi ka Pakistan ka la ju pynsalia tiak shi tiak khamtam ïa ki khap – pud, bad ka India barabor ka la ju phah da ki shithi ujor sha ka Sorkar Pakistan shaphang kitei ki jingjia ha khap – pud.
Bunsien ka India kam ju pynsngap ïa kine kiei kiei, namar ka long ka Ri kaba kdup ia ka jingsuk, kaba ïaid bad trei kam ha ka lynti jingsuk, hynrei kane ka la pynkyndit bynriew ïa ka Ri India ba ym dei baroh kiba kwah bad ñiew kor ïa ka jingsuk. Ar snem mynshwua kane ka la jia haba ka China kaba ka India ka ju khein ba ka long ka para marjan bad paralok baieit, ka la thombor kynsan kynsan ha ki pud ba shatei jong ka Ri India. Kane ka jingjia ka la pynpeitmat ïa ka Ri India ba dei ban pynkhlaiñ ïa ka Ri ban da ïa la ki pud. Kumta naduh katei ka por ka India ka la sdang ban pynkhreh ïa la ki shipai ki swar bad ki tiar ialeh, khnang ban pyndonkam ïa ki ha kano kano ka por kaba dawa ba dei ban pyndonkam.
Katba kine ki jingpynkhreh ki dang ïaid, kyndit kyndit sa ka Pakistan ka la pynjur ïa ki jingsiat ha ki khap – pud bad ka la tur bad buhai ïa ki jaka ka India ha Rann of Kutch. Hato kine ki jingleh jong ki marjan jong ka India kin lah mo ban pynsah ha ka jingphohsniew ïa ka jingsuk. U lymda ki jaka ba la wan tab u mynder Ri ym shym la ioh biang ha la ki kti. Kumta ka long kaei kaei kaba sngewtynnad ba ki Rangbah Nongialam jongngi, ki la kut jingmut ban nym ïa kren ei ei shaphang ka jingsuk tad ynda u nongthombor u la kynriah na ki jaka kiba u la wan tab jubor. U Myntri Rangbah Shastri u la pynpaw ïa kane ha ka jingkren jong u hapoh Dorbar Thaw Aiñ bad ruh kiwei kiwei de kum u Mr. Chavan, u Myntri ïada Ri ka Ri India.
Kan long kaba sngewdei shibun lada, kumba la kren kine ki Rangbah ka India, kumjuh ruh dei ban leh ha ki kam, ba ngin klet noh shuwa ïa ka jingsuk bad ba pynkhreh ïa ka thma ban beh ïa u nongwan thombor na ki jaka jong ka Ri India. Kane ka long ym tang ïa ki shipai Pakistan kiba la tur shapoh ki jaka jong ka India kumjuh ruh ïa ka China. La sngewdei ba ka por ka la poi ba pyni ba ngim dei kiba tang ka ktien, hynrei ban ïa pyni lem ia ka bor khnang ba u nongpynkhih pyrthei un pyrkhat arsien shuwa ban lushia ïa kiei kiei kba dei ka jong kiwei.
