Raphael Warjri
Kumba long mynta ha ka imlang sahlang ha ka jylla Meikhalaïar, khamtam ha Ri Khasi ki sohkyrdot jong ka rukom korbar kam naduh na ïing haduh ha shnong, ha ka kur bad ha ka jylla baroh kawei ka donkam ban pynbeit ryntih shwa ban kylla lieng bad kie berong ka synshar shnong synshar jylla. Kumba lah kdew ba kito kiba khlem bud shuh ïa ka riti dustur tynrai ki ïa don lang ha manla ki jylli korbar kam la ha shnong, ha ka kur ha ki seng-bhalang, te kumno yn seng nongrim ïa la ka kynhun kum ki paidbynriew salonsar ban long ryntih. Ka Dorbar Thawaiñ Dalariti (KHADC) ka la leh la ka kamram ban thawaiñ kiba dei shisha ban ïada bad pynneh ïa ki riti dustur tynrai, hynrei ki kher ki mer rangbah kiba bat ïa ka iktiar ha ka sorkar jylla la jyllei da kito kiba ym suitñiew shuh ïa la ka tynrai longbynriew manbynriew bad ka korbar kam ha ka shlemtrei sorkar jylla ym long shuh kaba ryntih. Ki don ki paidbah kiba sin ba rngop ïa ka KHADC ba ym ler kam shuh bad ki don ruh kiba tngen ba dang don ka atiar aiñ ka ba dang tipbriew ban ïada bad pynneh la ka riti dustur tynrai. Na baroh arliang ki don la ka ñia kaba biang, hynrei ka marryntih ka dei ban don da kaba lah ban pynbeit bad pynbiang da ka aiñ kaba skhem.Ka jingbakla ka la sdang naduh nyngkong ba la urlong kata ka atiar ïada bad pynneh riti katkum ka riti synshar ka Ri India. Kum ka atiar aiñ, ka Khyrnit Bahynriew jong ka Riti Synshar ka Ri India ka long kaba la bit la biang na ka bynta ban ïada bad pynneh ïa ki hok jong ki paidbah kiba dei ki trairi traimuluk.Hynrei dei ki nongmihkhmat kiba la ioh ka kyrdan ban synshar kiba la ïaid lait na kiba bun kiei kiei ban sah budnam hakhmat ka pyrthei haduh ba ki paidbah kim nang shuh ban suitñiew ïa kata ka shlem ïada bad pynneh riti.
Ha kaba bishar bad jurip ïa ka riti dustur, lehse donkam ban sngewthuh shwa ïa ka jingmut tynrai naduh na tyllong jong ka kyntien. Katba lah ban sngewthuh ki bun ki paidbynriew ha pyrthei kiba pyndonkam da ka kyntien ‘riti’ ka ba thew ïa ka dei-riti tynrai jong ka jaitbynriew. Ban kham sngewthuh shai ïa kane ka phang, lah ban tihsani (research) na tyllong jong ka ktien, da kaba shim nongmuna na ka ktien phareng ‘Culture’ ban lah ban poi sha ka jingsngewthuh ba paka bad pura. Ka tyllong jong ka kyntien phareng ‘Culture’ ba la sot na ki jingbatai ka long kumne harum:
The word “culture” has its origins in Latin :
“It comes from the Latin word cultura, which means “cultivation” or “tending”, especially in the context of agriculture.
m Cultura is derived from the verb colere, which means “to till,” “to cultivate,” or “to care for.”
Katkum ba la batai haneng ha ka ktien phareng, ka tyllong jong ka kyntien ka dei na ka ktien Latin ‘Cultura’ kaba mut ban tih ban puh lyngkha, bad ban sara ban kara jynthung, ha ka rep ka riang. La sot ia kane ka kyntien na ka tienleh tienjia (verb) ‘Colere’ kaba mut tih, ne puh ne sumar sukher. Kumta ka dei ka ktien ba synlar.
Lada khmih ïa ka ka san ka mer jong ka ktien, lah ban buddien ïa ka khanamynnor katkum ba kyllamaian (transformation) ha ka thoh ka tar bad ha ka rukom im jong ki bynriew ha ka imlang sahlang. Kata ka rukom san rukom mer jong ka ktien lah ban bishar na kine ki ïa shaipyrthei ba la sot na ki jingbatai ba la kdew harum :
“Early Use (Medieval and Renaissance Europe):
m Initially, “culture” was used in the context of agriculture – the cultivation of land or crops.
“18th-19th Century Enlightenment (Europe):
m The meaning evolved to describe the cultivation of the mind and intellect – for example, refining taste, manners, and education.
m Thinkers like Voltaire and Herder used it to refer to civilization and national identity.
“Modern Usage:
m In the anthropological and sociological sense, “culture” refers to the shared beliefs, practices, customs, languages, and values of a group of people.
Naduh kulong kumah haduh ba la sdang san sdang mer ka shaipyrthei, ha dewbah Europe, ka kyntien ‘Culture’ ka thew beit thik ïa ka rep ka riang ïa ka khyndew na ka bynta ka thung ka tep. Ha ka spahsnem ba khatphra bad khatkhyndai pat ka kyntien ka la pet (evolve) ban batai ïa kaba kyrsoi ïa ka bor janor bad bor shemphang. Nangta ka la nangsan shuh shuh ban kdew ïa ka shaipyrthei bad ka snaptynrai-Ri. Ha ka juk mynta ka la nangsan bad nang ïar shuh shuh ka jingmut ha ki shnat stadtip stadmaïan ba ïadei ïa ki bynriew bad ka imlang sahlang, kiba kdew kyllum ïa ka jingngeit, ka treikilan, ki dustur, ka ktien bad ki dor bakor jong ka kynhun bynriew.
Kumta naba sdang ka ktien ‘Culture’ ka dei kaba synlar bad kaba kit jingmut ha kaba tih ba puh lyngkha, ba kara sara jynthung ha ka khyndew, bad lyngba ki sngi ki ïa ka la kit jingmut khiathew bad ïar kaba kynthup ïa kaba kyrsoi ha ka jingim ki bynriew, naduh ka mut ka pyrkhat, ka dustur ka rukom bad ïa ka imlang sahlang shityllup ha kawei ka kynhun paidbynriew.
Ha ka rukom pyndonkam ïa ka ktien Khasi ka riti dustur ka la biang thew ban batai sani ïa ka jingmut kum ïa ka kyntien ‘Culture’ ha ka ktien phareng.Hynrei namar ba ka kyntien riti dustur ka don la ka rukom pyndonkam kaba kham ïajan bad ka ktien phareng ‘Custom and usages’, kumta ki don ki khrawpyrkhat kiba la shna da ka ktien thymmai ‘Deiriti’ ka ban kit jingmut kum ka ktien phareng ‘Culture’.
