Bun kiba sngewtynnad bad sngew phuh mut phuh mat la ki jinghikai niam bapher bapher. Hynrei ki klet noh ïa la ka riti ka dustur la jong. Kane ka long ka jingbishni jongnga ba kiba bun ki la klet ïa ka tynrai ba la buh u longshuwa u manshuwa. Ki ïa bud ïa ka rongphong jinghikai niam kaba hikai ban ioh leit beit sha bneng ym ban sah sah hapoh kane ka pyrthei. Tip ngin ioh leit bneng ne ngi ioh leit rung sha lyndet ka thliew khyndew. Hooid ngi don ha kano kano ka niam hynrei ym ban sngew khyllew ban ngin sngew kham halor ïa kito ki bym don ha ka niam.
Namar u briew u long hi u briew watla u don ha kano kano ka niam ruh. Ka jingim jongngi ki briew kam don jingïapher haba ngi long niam ne bym long niam ruh. Namar u Blei u la thaw ïa u briew ym ïa ka niam. Ka niam ka hikai ba ngim dei ban don ka mynsiem bishni pihuiñ para briew.
Ngi dei ban ieit wat ïa u nongshun ruh. Hynrei kiba bun ki sngew ba dei tang ka niam kaba lah ban ai jingsuk bad pyllait im ïa u briew. Dei kane keiñ kaba ïalam ïa ngi sha ka mynsiem sngew sarong para briew. U Blei u hikai shaphang ka jingieit.
Kumta ngim dei ban ia shun ne ïa isih para briew. Hynrei ka jingsngew pher niam ka jur bha hangne hapoh kane ka lyngwiar ka imlang ka sahlang jongngi ki briew. Te lada ngi bud beit ïa ki jinghikai ki kpa tymmen jongngi ngim ym saphret na ka imlang ka sahlang bad ha ki longïing longsem jongngi.Namar ha ka jingim briew bad ka imlang ka sahlang jongngi la dap sa tang ka bishni ka pihuiñ bad ïapher jingmut jingpyrkat wat shi ïing shi sem ruh. Hato dei na kane ka daw ba ki mih kine kiei kiei. Hato ym dei ka jinglong niam kaba pynsngew sarong parabriew namar ka jingïapher ha ka rukom ngeit niam. Kiwei ki don ha ka niam kaba rit bad kiwei ki don ha ka niam kaba heh. Kane keiñ kaba ïalam ïa ngi sha ka jingjot ym sha ka jingbha para briew. Ki don kiba sngew sarong ba ki long niam, bad ki sngew ba dei tang ma ki ki ban ioh ïa ka bneng.
C. B. Iawphniaw
