Raphael Warjri
Lehse, ka kyntien Deiriti kaba la ju don lypa ka ban ïa ryngkat bad khia thew kum ka ktien phareng ‘Culture’ ha ka khep ba mynta. Napdeng ki nongthoh Khasi ka juk mynta, I Bah Dondor Giri Nongkhlaw I ju pyndonkam da ka kyntien Deiriti kaba ryngkat kum ka kyntien phareng ‘Culture’. Kham hadien pat I Kong Helen Giri Syiem I la shna da ka kyntien ‘Lariti’ bad la shem ba ki nongthoh ba kham hadien ki la kyrsum ban pyndonkam ha ka mon lajong ïa kine ki kyntien baroh artylli. Hynrei kaba kham paw shynna ka dei ka kyntien ‘Kolshor’ ba la kham pyndonkam paidbah, khamtam da ki simpah simsong, nongthoh bad samla pule na ki shlempule ba kham kiew irat. Kum ban shu pashat jingmut ka long kaba sngew lymbiang ban pyndonkam da kaba shu spule Khasi ïa ka ktien Kolshor na ka ktien phareng ‘Culture’. Kito kiba pynksan ïa ka ktien Kolshor ki don la ka ñia ban batai ba ka ktien kan roi lada kynthup na ki ktien nongwei kumba long ka ktien phareng. Shuh shuh la ong ba ka ktien Culture ka ïar haduh katta katta ba ym don ktien Khasi ka ban lah ban ïa ryngkat. Ha ba sngap ïa kita ki ñia te kaba sngew dei shisha. Hynrei kaba donkam ban pynneh da la ka ktien tynrai lajong ka long kaba kham sngew shongkun bad ka biang kham bha ban ïa kaba shu shim kylliang jong kiwei. Ka shong katkum ka dawshai (context) ban pynksan ñia ïa ka rukom thoh ïa la ka ktien kmie kaba dei ka ktien tynrai.
Ïa ka ktien Khasi ym lah ban tynjuh lane nujor bad ka ktien phareng haba pynksan ban roi ka ktien dei ban tynneng shim kylliang na kiwei ki ktien. Ha kane ka phang la sngew dei ban puson ba ka ktien phareng (English) ka dei kaba la saphriang shityllup ka pyrthei ha kaba lah ban tynneng kumno kumno ruh ka pyrthei ka pdiang. Hynrei ka ktien Khasi ka dei kaba shitroh kiba kren, pule ne thoh kumba long byllai kiwei ki ktien kmie ktien tynrai, lada dei ban nujor bad ka ktien phareng. Kumta katlah katiai dei ban pyrshang ban pynneh da la ki tynrai ktien lajong ba kham biang bad shongkun, bad ha kajuh ka por kan long kaba beit ryntih haba don ka khep ban takhuh bad kiei kiei ki ktien ba ïadei. Kum ka nuksa ka ktien riti dustur ka la jah syndon la da shim kylliang da ka ktien phareng ‘Culture’ ban thoh Kolshor. Ha la ka jingbishar shimet ka long kaba sngew saitmet ban tynneng haba dang lah ban shna da ka ktien tynrai lajong.
Lada pynshongñia ïa ka jingïar bad khia thew ka ktien ‘Culture’ haduh ba hap ban tynneng matlah ban shim kylliang na ka ktien phareng Kolshor. Ka don ka ñia ba lah ban pynksan katkum ka ïailong (logic) kaba skhem ban tapnia. Kumba la thoh ha ka marmat (article) ba ha shwa ryngkhi ïa kane mynta, la batai ba ka ktien ‘Culture’ ha kaba sdang ka kit jingmut ba synlar, kaba mut ‘tih’ ne ‘puh’ ne ‘kara’ kaba ïadei ha ka thung ka tep ka rep ka riang. Hynrei hadien ba la san la mer bad la kiew irat bha ka thohkot thohsla ha Ri Sepngi. Ïa ka ktien ‘Culture’ la batai kham khia thew noh kumba sngewthuh ha kane ka juk mynta.
Naduh kulong kumah haduh ba la sdang san sdang mer ka shaipyrthei, ha dewbah Europe, ka kyntien ‘Culture’ ka thew beit thik ïa ka rep ka riang ïa ka khyndew na ka bynta ka thung ka tep. Ha ka spahsnem ba khatphra bad khatkhyndai pat ka kyntien ka la pet (evolve) ban batai ïa kaba kyrsoi ïa ka bor janor bad bor shemphang. Nangta ka la nangsan shuh shuh ban kdew ïa ka shaipyrthei bad ka snaptynrai-Ri. Ha ka juk mynta ka la nangsan bad nang ïar shuh shuh ka jingmut ha ki shnat stadtip stadmaïan ba ïadei ïa ki bynriew bad ka imlang sahlang, kiba kdew kyllum ïa ka jingngeit, ka treikilan, ki dustur, ka ktien bad ki dorbakor jong ka kynhun bynriew.
Kumta naba sdang ka ktien ‘Culture’ ka dei kaba synlar bad kaba kit jingmut ha kaba tih ba puh lyngkha, ba kara sara jynthung ha ka khyndew, bad lyngba ki sngi ki ïa ka la kit jingmut khiathew bad ïar kaba kynthup ïa kaba kyrsoi ha ka jingim ki bynriew, naduh ka mut ka pyrkhat, ka dustur ka rukom bad ïa ka imlang sahlang shityllup ha kawei ka kynhun paidbynriew. Na kata ka daw la sngew dei ban pynksan ñia ba ka ktien ‘Deiriti’ ka long ka ba biang ban kit jingmut ïa ka ktien phareng ‘Culture’, lehse ka kham khia thew ban ïa ka ktien phareng ne kiwei kiwei ki ktien. Ka jingmut jong ka ktien Deiriti ka long ba baroh kiei kiei ha ka lyngwiar kyllum jong kano kano na ki paidbynriew, ha ka imlang sahlang, ha ka trei ka ktah, ka shad ka kmen, ka rwai ka siaw bad ka ktien ka thylliej, ki Dei jong ka Riti lajong ha lade, khlem da ïa khleh khawlang bad kiwei. Kumta Deiriti ka long ka ktien ka ba snah bha ban kit ka jingmut ha ka ktien phareng ‘Culture’ katkum ka dawshai ka juk mynta, bad ka long kaba sngew sarong ba don hi la ka ktien kmie kaba lehse naduh mynhnor ka la khiathew lypa bad ka long ka ktien kaba shongkun ha la ka ktien kmie ktien tynrai lajong, ym kaba shu tynneng da ka ktien Kolshor, kaba sngew jli bad saitmet. Jar la katta ym lah ban pyntian jubor ïano ïano, hynrei ka dei tang ka ñia ba la pynksan halor ki nongrim kiba skhem.
