Shillong, Jylliew 05
Ka Portugal ka la wanphai biang da ka jingjop 2-1 kol ïa ka Germany ha ka semi-final jong ka Nations League kaba la long ha ka step jong ka Sngi Palei ha Munich.
Kumta kane ka kynhun ba la lamkhmat da u Cristiano Ronaldo ka dei ka sien ba ar ban jam sha ka final naduh ba une u khlur ïalehkai ba la 40 snem ka rta u la shimti kum kapten bad ban thep haduh 137 kol ha ki lympung ïalehkai bar ri bad ruh ban long u rangïalehkai ba la rim tam ban thep shi kol ha kane ka jingïakhun pyrshah ïa ka Germany.
Kane ka kol jong u Ronaldo ka la wan hadien san minit hadien ba u Francisco Conceicao u la pynïakhaid ha ka minit kaba 63, kaba la ïarap ïa ka Portugal ban jop ïa ka jingduna ba nyngkong jong ka bad pynkut noh ïa ka jingshah rem shimet jong u Ronaldo pyrshah ïa ka Germany.
Wat hapdeng ka jingbym lah ban thep kol ha ka kylla step, hynrei hadien lai minit ba la bteng ïa ka jingïakhun jong ka kylla miet u Florian Wirtz u la ïoh ban pynkhih jar nyngkong na ka bynta ka Germany, hynrei ka jingkylliang rangïalehkai da u coach ka Portugal u Roberto Martinez ka la wanrah ïa ka jingjop.
U rangïalehkai ba kynsai ha ka Champions League u Vitinha, uba la ïarap na ka bynta ka Paris Saint-Germain ban jop pyrshah ïa ka Inter Milan ha kajuh ka stadium ha ki saw sngi ba la dep, u la lah ban ïalehkai bha hadien ba u la mih na ka jaka shong. U rangapkol ka Germany u Marc-Andre ter Stegen u la ïeng skhem ban khanglad ïa ka Portugal hynrei ha kaba kut um shym la lah ban pynurlong.
Ki ‘rangïalehkai shadien ka PSG kum u Joao Neves bad u Nuno Mendes ki la long ki rangïalehkai kiba la ïoh ban ïalehkai naduh ba sdang na ka bynta ka Portugal, katba u Nick Woltemade, u la sdang nyngkong eh na ka bynta ka Germany. U Conceicao u la lah ban pynpaw ïa ka jingtbit hadien ba u la lah ban pynkhih jar, da kaba thep ïa ka kol kaba itynnad bha lyngba ka jingïarap ban pynbuh bol da u Robin Gosens. Nangta u Mendes u la ai ïa ka jingïarap ban pynbuh bol na ka bynta u Ronaldo uba khlem pynlehnohei ïa kane ka kabu ksiar hadien san minit.
Wat lada ka Portugal ka la ïoh ban buh jaka ïalade sha ka phainal, hynrei kan hap ban ap ïa ka kynhun na ka bynta ban ïaknieh ïa ka nam lahduh.
Kane ka jingjop ka long kaba kongsan bha na ka bynta u Ronaldo uba mynshwa u la shah rem ha baroh saw tylli ki jingïalehkai ba u la ïakhun pyrshah ïa ka Germany. Na ka bynta ka Portugal, kane ka dei ka jingjop kaba nyngkong eh pyrshah ïa ka Germany hadien 25 snem bad ka jingjop kaba nyngkong eh ha Germany ha ki 40 snem tam.
