Shillong, Jylliew 05
Ki ar ngut shipara kiba dei na Mawlai Nongkwar Block-13, ki la shah dung bad shah ot da ka tari ha ki nongtuh ha ka step phyrngab jong ka 05 tarik u Jylliew 2025.
Kane ka la jia katba kine ar ngut shipara ki dang ïakhun bad ki nongtuh kiba la thmu ban wan tuh na kawei ka karkhana kali kaba don marjan bad ka ïingsah jong ki.
Haba ïoh ban ïakren bad uwei napdeng kine kiba la shah ot da ka tari uba dei u hynmen, u la ïathuh ba hynne ka step ha ka por 3 baje eiei, hadien ba ki la ïohsngew ïa kawei ka kali kaba wan ïaid bad thmu tuh na katei ka karkhana kitei shipara ryngkat bad ki paramarjan ki la leit ban bat ïa ki.
U la ïathuh ba ha ka por ba ki bat bad ïakren da ka ktien kaba jem ïa kitei ki nongtuh, da kaba kylli ba balei ki wan ïaid la katta miet, hynrei katba ki dang ïakren kitei ki nongtuh ki la mareh bad phet krad na katei ka jaka.
Mar kumta ma u, ryngkat bad u para ki la leit ban kthong ïa kitei ki nongtuh kiba la mareh bad ha kata ka ka por uwei u nongtuh u la sei da ka tari bad dung ïa u para na ki bynta jong ka lbong, u la ïathuh.
Wat la katta ruh, ki la ïoh ban bat ïa uwei u nongtuh bad uwei pat u la lait phet noh.
U hynmen u la ïathuh ba u la mynsaw malu-mala na ka kti kaba u la shah ot bad u para jong u pat u la kham mynsaw jur namar u la shah dung na ki bynta jong ka lbong bad mynta u la don ha Robert Hospital ban shah sumar.
Kine ki nongtuh ki la wan da kawei ka kali kamai kaba don ïa u Registration Number ML 06 5732 bad ïa kane ka kali la aiti noh sha ki bor pulit.
Une u nongtuh uba la shah kem u dei uba kyrteng u Debarlang Kharmusulmar, 29 snem ka rta bad ïa une ruh la aiti noh sha ki bor pulit bad ka jingtohkit ka dang ïaid shakhmat ban lap sa uwei pat uba lait phet.
Haba ïoh pat ban ïakren bad u hynmen jong kine ar ngut shipara ha Robert Hospital, Shillong, u la ïathuh ba katkum ka jingpeit jong ki bahaïing ba ka tari ka la rung kumba 5 ne 6 inshi shapoh ka lbong jong u para jong u bad ka jingphlei snam kaba la jur haduh katta-katta, katba u para pat u shu mynsaw tang malu-mala na ka kti.
Utei u hynmen u la ïathuh ba u para khatduh uba la shah dung da ka tari na ka lbong uba la wan phah sumar ha Robert Hospital u la kham ïoh bor mynta, hynrei um pat lah pat ban ïaid ban ïeng namar ka dang shitom palat.
