D H Kharkongor
Kaba la jia ka la jia. Ka jingjia pat de ruh kaba ym don ba poi pyrkhat, kaba pynkyndit kumba ïoh ïuhtdong bseiñ bad kaba sngewsih. Kaba da pyndiaw shisha ïa baroh, kata, naduh ïa ki trai tad haduh ïa ki kliar, kaba katno tam ïa kiba dang tipbriew tipblei ne kiba dang tip ïa ka hok ïa ka sot. Kat haduh ban da shim syndon noh ïa ka mynsiem briew te ka dei shisha ka pap ka sang. Ka pop ka sang kaba ha khmat u Briew ha khmat u Blei, naba kampher la u dei u trai shnong ne u nongwei shisngi; u bakhraw-batri ne u riewmadan; uba pahuh pahai ne uba kyrduh. Ka dei ka pap ka sang bad kampher la u dei na kano kano ka kynhun jaitbynriew ne na kano kano ka niam ne ka jingngeit. Kata, lada ka dei shisha ka jingshah pyniap ne ka ‘murder’ ne ka ‘homicide case’.
Ka jingjia kaba ktah matïong ïa ngi lang baroh bad ym eh tang ïa ka nam bad ïa ka burom jong ka thaiñ Sohra. Lah ban ong ba ka lah ktahjur ïa ka nam bad ïa ka burom jong ka Meghalaya hi baroh kawei. Ka la kylla long ka kabu ksiar ïa kiba don daw ne kiba lap daw, ban biah phongrai ïa ngi baroh lang, kum ka jaitbynriew Khasi. Kaba katno tam wei ba don kiba ïai pharep pylleiñ pylleiñ ba ïa kata ka kam bymman la leh da ki trai jylla. Te ha kaba ïadei bad kita kiwei pat ki jaitbynriew, khamtam kiba na kiwei kiwei pat de ki jylla jong ka India, ba katba kiba ngeit ki ngeit ki bym ngeit te kim ngeit hynrei ki artatien, ïa kaba ngim sngewphylla.
Ka jingngeit bad ka jingbym ngeit ka jong kita kiwei pat ki jaitbynrew ka long bunsien bunsien kat kum kaba ki hi shimet shimet ki lap ki shem ne ki ïa kynduh. Ka shong namar kata katkum ka jinglong ka jong u jong nga bad u jong phi hi, ïa uba kita kiwei kiwei pat ki jaitbynrew ki la ïashem ki la ïakynduh ne ki la ïadei kam ïadei jam. Ka jingngeit ne ka jingbym ngeit ka jong ki ka long kat kum ka akor ka burom ka jong kita ki jong nga ki jong phi hi, kiba kita kiwei kiwei pat de ki jaitbynriew ki la ïashem ki la ïa kynduh ne ki la ïadei kam ïadei jam. Kin shim ba ngi baroh ngi dei ki ‘Ngap’ lada ki la ïashem ïakynduh ïa ki ‘Ngap’. Kin shim bad kin nam pat de ba ngi baroh ngi dei ki ‘Kaiñïong’ bad ruh ki ‘Kaiñpyrjong’ lada jia ryng-khat ba ki ïashem ki ïakynduh, ia ki jong nga jong phi, kiba kum ki ‘Kaiñïong’ bad kum ki ‘Kainpyrjong’.
Ym duh, ha man ka jaitbynriew, kiba kum ki ‘Kaiñïong’. Kiba ka jinglong jingim ka jong ki, kaba man la ka sngi, ka biah phongrai ïa la ka jong ka jaitbynriew hi baroh kawei. Kiba pynthut pynsalia ïakat uba ki iohlad ban pynthut pynsalia, thik kumba pynthut pynsalia u ‘Kaiñpyrjong’. Kaba katno tam ïa u nongwei shisngi. Ngim duh ha man la ki shong ki thaw ïa kiba kum kita. Ki riew shim kabu, ïa u nongweishisngi, ki don ha man la kawei pa kawei ka jaitbynriew. U riew shim kabu un poi ban krih shane bad shatai ban wad lad wad lynti da kumno ban shim kabu la ïa une ne ïa utai.
Kumta ym baroh uba wan poi ha ka thaiñ Sohra u dei u nongrkai pyrthei uba shisha. Ym duh uba leit khnang shaduh Sohra da ka jingthmu ban ap thap ne ban ioh shim kabu, da kumne bad da kumta, la ïa une ne ïa utai. Kumta ym duh ban don ne ban wan poi ki ‘Kaiñïong’, ki ban biah phongrai ïa ka thaiñ hi baroh kawei. Ym duh ruh de ban don ne ban wan poi ki ‘Kaiñpyrjong’, ki ban pynthut pynsalia la ïa une ne utai da kumne bad kumtai. Ka ju long kumta kumjuh wat sha kiwei kiwei de ki jaka kiba khring ia ki nongrkai pyrthei. Kum ka nuksa ba kiba nabar ki la ju pynbudnam teng ïa ka Goa. U Charles Sobhraj, ïa uba la nam ‘The Serpent’, u dei uwei na ki. U poi leit leh kam bymman wat shaduh sha Nepal bad Thailand.Khatduh la ioh ban kem ïa u na ka O’Coqueiro’, Goa. Ka New Delhi ruh ka lah budnam bad ki nongpynbudnam kim dei beit thik ki nong New Delhi. La lap bunsien ba kiba pynbudnam ïa ka New Delhi ki dei kiba nabar, kiba ym tang na Meerut bad Ferozpur jong ka Ghaziabad hynrei wat naduh na Agra. Wat kiba wan poi naduh na Bihar.
Kaba la jia ka la jia bad ym leh leh ei ei shuh. Kumta to ngin shim ïa ka kum ka jingkyrsiewthiah. Shim ïa ka kum ka jinghikai. Namar kata to ïa puson kloi noh da kumno ban ioh biang ïa ka jingshañiah bad ia ka jingsngewshngain da baroh.To shim kloi noh ïa ki lad ki lynti ban pynthikna ïa ka jingshngaiñ. Ka dei ka bynta ne ka kamram jong baroh lang bad ym tang ka Sorkar lem bad kiba don bynta bad ka kamrkaipythei. To da ïa pyntreikam kloi lan ruh ïa ki.Ngin kyrmen ba nangne sha khmat kaba kum kato kan nym jia shuh, khnang ba ngin iohbiang, kum ka jaitbynriew, ïa ka nam bad ïa ka burom kaba ngi dang dep ban shah pynthoh bria.
