Kumba ngi la ju tip baroh ha kaba myn nyngkong eh la wan ki Missionary Khristan na Ri Phareng Sha Ri Khasi bad ki la buh ïa ka jaka trei kam jong ki ha ki thaiñ Shella. Kine ki Missionary ki la ïaleh ban pynkylla Khasi ïa ka Kotbah ba khuid (BIBLE) khnang ba ki paidbah Khasi kin nang ban pule Bible bad ban kin sngewthuh ruh ïa ka Ktien U Blei hynrei ha kita ki por ym pat don dak Khasi satia, te ki la thoh noh ïa ka ktien Khasi da ki dak Bengoli. I pa jong nga I (L) Mr. Edrowell Thabah i la ju ïathuh ba bun ki Nong Shella, ki nang bha ban kren bengoli ba ki ïa trei ia ktah bad ïa khaïi pateng bad ki khar Bengoli mynba dang ïa long lang kawei ka Ri. La sngewthuh ba ïa ka Bible Khasi ba nyngkong duh la thoh da ki dak Bengoli. Kane ka Bible Khasi ha ki dak bengoli ka dang don haduh mynta ha Kolkata bad ri tyngkai bha ïa ka, lehse ka ktien Khasi ha kita ki por kam pat dei satia ka ktien ki Nong Sohra lehse ka dei ka ktien Khasi Nong Shella namar ym pat don ktien Khasi Salonsar ne ktien Sohra kumba long mynta. La ngeit ba ïa ka ktien Khasi Shella la pynkylla ktien hi da ki riew stad jong ka thaiñ Shella hi kiba la nang la stad ha ka thoh ka tar dak bengoli. Kumta ka lah ban pynkylla BIBLE KHASI da ki dak thoh bengoli. Ha kawei pat ka por ha ka sien kaba ar la wan pat u Missionary Phareng na Ri Wales bad ula buh ïa ka jaka trei kam jong u ha Sohra kaba dei ruh ka Nongbah jaka trei kam ka sorkar phareng. U Rev. Thomas Jones u Missionary u la poi ha Sohra ha 22 tarik u Jylliew 1841 bad haba u la shong katto katne por ha Sohra u la thaw ïa ki dak Khasi ABKD ter ter haduh Y bad la tip ruh kum u Kpa ka Thoh dak Khasi haduh mynta. U la lah ban pynkylla ktien Khasi ïa ka Kotbah (Bible) da ki dak Khasi ne Roman Script ym shuh da ki dak bengoli. Ka ktien NongSohra ka la kylla long ka ktien Khasi Salonsar ha ki Skul baroh. Lada ngi hap ban thoh ktien Khasi da ki dak Bengoli katno ka long kaba jynjar haduh katta katta. Ki Tripura ki don ia ka ktien jong kiba tip kum ka Kokborok Language hynrei ki la hap ban thoh ïa ka ktien jong ki da ki dak bengoli ki la shem jynjar sat haduh mynta. Ki student ki kwah ban lait noh ban thoh da ki dak bengoli. Ki la dawa na ka sorkar la slem bha hynrei kim lah ban lait satia. Ha Tripura ki don ka Twipra Student Federation ki la ïai dawa na ka Sorkar ba lait noh ka thoh dak Bengoli hynrei mynta kim pat lait satia ban thoh ïa ka ktien la jong da ki dak bengoli ki kwah ban ioh thoh noh ïa ka ktien Kokborok jong ki da ki dak Roman Script. Kum thoh ma ngi ki Khasi. Ki Garo ba kan long kaba kham suk ïa ki. U Blei ula ïada kyrpang ïa ngi ki Khasi ban lait na ka thoh dak bengoli ïa ka ktien Khasi kumba long ka Tripura ki para riewlum.
Da ki jingleh phylla U Blei ula phah ïa u Rev. Thomas Jones ha Ri Khasi ban thaw ïa ki dak thoh Khasi ban ïada ïa ngi ki Khasi ban lait ka thoh dak bengoli ba la thoh ïa k BIBLE Khasi ba mynnyngkong. U Blei u ieit bad ïada kyrpang ïa ngi ki Khasi, U Blei u pyntyllun bad u pynïaid ïa kiei kiei baroh na ka bynta ka jingbha jong ngi ki jaidbynriew Khasi to ngin long ka Jait Bynriew ba Duwai ïa U Blei bad ban im hok.
Dr. Boss L. Marthong
New – Nongstoiñ
