Ki dustur ki riti nongwei ki pynpait pynpra ïa ka dustur jongngi ki Khasi – Pnar. Ka dustur ka riti ba la seng bad buh u longshuwa u manshuwa ki la nangtroiñ mynta. Ka rukom bat ïa ka riti ka dustur hiar pateng na u longshuwa ka la nanghiar katba nang mih ki sngi ki ïa. Ka dustur jongngi ki rit paid kim lah shah ha khmat ki dustur ki heh paid. Haba nga ong heh paid ka thew lut ïa baroh ki dustur ki jaitbynriew heh paid kum ka dustur leh niam khristan. Ka dustur leh niam Hindu, ka dustur leh niam Muslim bad shibun kiwei kiwei ki jait jinghikai ki pyntroiñ ïa ka dustur ka riti jongngi. Ka dustur jongngi ki Khasi ki la nangñiar katba nangmih ki sngi ki snem. Namar bun ngi la ïa beh ïa ka rongphong jinghikai u nongwei nongar. Shubuh kum ka dustur leit rah synñiang u bynhei haba iap ki kmie ki kpa tymmen na ka liang ka Meikha bad ki khun kha ki ju ai da ki Masi, ki sniang bad kiwei kiwei ki la jah mynta. Nangta ka rukom kum ha ka rwai ka siaw, ka put ka tem ruh ïa kham ïa beh ïa ka rukom jong kiwei. Ka riam ka beit ruh la kham ïa beh ïa ka rukom kiwei ki jaitbynriew. Ka rukom pynïathoh shongkurim ruh la kham ïa beh ïa ka rukom kiwei. Ka rep ka riang ruh la kham ïa beh ïa ka rukom hikai jong kiwei ki jait rukom rep. Ka leh kmen leh sngewbha ruh la kham ïa beh ïa ka rukom leh kiwei. Haba phai ha ka dustur ba la buh u longshuwa u manshuwa ki la nanghiar bad nangtroiñ na kawei ka por sha kawei pat. Ka da eh ban pynneh pynsah ïa ka dustur ka jaitbynriew jong ngi ki rit paid. Kane ka long ka jingiohi jongnga halor ka dustur ka riti jongngi.
C. B. Iawphniaw
