U Nongsaiñ Hima, 1979
Kane ka kyntien ‘Imlang Sahlang kam mut ba baroh ngi dei ban shet ja da u khiew uba heh ne ban ïa bam lang ia kata kaja kata ka jia kaba la shet ne kam mut ba ngi dei ban shna ka ïing kaba heh bad baroh ngin ïa sah lang hangta. Kaba ïadei eh ha ka ktien phareng ïa ka jingmut jong katei ka kyntien ka long ka ktien ‘social.’ U briew u dei u kynja jynthaw uba ym lah ban im tang marwei, u donkam ki lok ki jor, ki kha ki man etc. Lada don uba sngewbha ban im tang marwei la dei ban pyrkhat ba uta u dei ban long u jynthaw uba pher bad bym ïadei satia bad ka pyrthei ki briew. Namar ba u briew u dei u jynthaw uba dei ban ïa im bad kiwei ki para briew, donkam ka akor, donkam ka jingpynïaid beit ïa ka jingïadei para briew khnang ba kan ym don kano kano ka jingthut ne kano kano ka jingpyn-dkoh ïa ka jingim kaba ïadei para briew. Katno kan long ka jingkordit ka jingim ha sla pyrthei lada baroh ngim kheiñ kor ïa ka jingïadei para briew ha ka ïaid ka ïeng ne ha ka shong ka sah. Kane kan ïalam sha ki jingkynrum kynram kiba khraw bad khlem pep yn ym don jingsuk ha pyrthei. Peit ki Khlur, ki Met bneng ha Bneng, peit ka Sngi, peit u Bnai kumno ki ïaid ïa ka lynti bad kim ju ïatyngkhuh ne ïaid bakla la ka lynti. Ka long kaba jem ban sngewthuh ba kan jia aiu ïa ngi lada kine baroh ki ïaidmon ïaid laitluid bad khlem pep kan don ka jingduh thiaw jong ka pyrthei baroh kawei. La ju bna nam ïa ka Akor Khasi ha ka ïaid ka ïeng, ka shong ka sah ne ha ka kren ka khana ne ha ka bam ka dih ne ha ka leh sngewbha leh sngewmiat. Hynrei la iohi ba kane ka dang duna shibun eh bad mih ki lad sniew kiba u khun Khasi Khara u la thap brai pynban.
Don kiei kiei kiba ktah ïa ka Imlang Sahlang. Dei kine ruh kiba ktah ïa ka jingroi jingsan ka jaitbynriew. Peit ïa ka ïakhalai,hato kam long kaei kaei kaba sniew, kaba tan kaba ring ïa ka jingïaid jignroi ka Ri ban kiew shaphrang ? Don ki briew kiba im ha ka ïakhalai bad ym tang ba ki pynjot ïa la ka ïing ka sem, ki long ruh ki nuksa ba paw tyngkrein kiba pynjot ïa la ki khun ki pyrsa. Ka kiad lada ym sumar bha hato kam long kaba pynrit pynrain bad ka daw kaba kongsan ïa ka jingpra ki ïing ki sem bad ka jingpynswai pynrit ïa ka jingïaid shaphrang ka jaitbynriew ?
Kumta ka long kaba da donkam eh ban hap ïa pyrkhat ïa kine kiei kiei baroh khnang ba ka ri Umsnam u ‘Ni u ‘Pa kan san kan roi irat bangin long ki trai shnong kiba bit nam ban shong ban sah bad im ha kine ki lum ba itynnad.
