Raphael Warjri
Lada ki briew ki kren da ka ktien briew, u ksew ne ka miaw ki lah ban shahshkor bad sngewthuh bad lada kine ki mrad ki pah ne jlaw ha la ka rukom pynmih sur kren ruh ki briew ki sngewthuh markylliang bad ka jingim ka ïaidbeit ïaidryntih da kaba shai kdar. Lehse haba ki longshwa manshwa ha ki khanatang ki ong ba ki briew bad ki mrad ki dang ïa kren, ka lah ban dei kumta ka pharshi ka ba phalang ïa ka ktien kyllum ba ïakren. Ha kajuh ka rukom ka lah ban long ruh ïa ki maw ki dieng, jynthung jyntep bad kino kino ki jynthaw ka mariang, kynthup ïa ki kynja mynsiem rngai. Kumba ha ka juk mynta ym lah ban peiphang ïa ka jingjia ba ki khla ki lah ban sumar sukher ïa ki khun briew ha ka syrwet jong ki ryngkew basa, kumta ruh ha ka juk mynnor ym pat poi pyrrkhat ba lah ban kren paidbah da ki kor sawa ha ka lympung ba da ki hajar ngut ki briew lane ban ïakren paramarwei na ka jingjngai ba da ki spah ne hajar mer. Ha ka khanatang Ri Khasi la don uwei u nongïathuhlypa uba ïa khana parom bad ki dkhiew ha ki por hyndai ha ka shnong Shangpung. Ha kata ka por uta u riewphylla uba la tip kyrteng da u Joh Ymbon u la shah ñiewbeiñ kum u bieit anna ha ki parashnong parathaw ka thaiñ Shangpung haba u ong ba por kan sa poi ba yn ïapeiñ dor ïa ki mar ki mata tang da ki sla- kata ka la urlong ha ka kot pisa tyngka ba mynta. U la ïathuh ruh ba u kynphad un kham khia palat ïa ka nar kaba lah ban per ha suiñ- kata ka la urlong ha ka liengsuiñ ba mynta. Hynrei ha kata ka juk mynnor ym lah ban mutdur ba ka nar kan per ha suiñ, lane ban ïapeiñ mar da ki sla, kumjuh ruh ha kane ka juk mynta ym lah ban mutdur ba ka phreit ka aibuit ïa ki bynriew ban khet pynkhyllem ïa u Diengiei, lymne ba ka sngi kan rieh ha krem lamet latang, tat haduh ba u syiar un jop pyrthei ban kynih man la ka step phyrngap shwa ban mih ka sngi. Ki bynriew mynnor kim lah ban im biang ha kane ka juk mynta ban sakhi ïa ka pisa tyngka, ne ka liengsuiñ, ne ki kor ki bor laiphewjait jong ka juk mynta, lymne mangi ha kane ka juk mynta ngim lah ban im ha kata ka mynnor ban peiphang ïa ki snap ki khanatang, puriskam purinam, parom paju.
Kaba ym lah ban poi pyrkhat ha ka mynnor ka la urlong mynta bad kaba ym lah ngeit ne pdiang ïa ki snap khanatang puriskam mynnor ha ka juk mynta, lehse ka dei kaba shisha hyndai hynthai ba ki briew ba mynta kim lah ban khajoh ne peiphang. Ka dei ka jingshisha ba ym dei ban ngeit matlah, hynrei ka dei ruh ka jingshisha ba kino kino ki snap khanatang ne puriskam ki dei kiba don ka sabut bad ka jingbatai kum ka pharshi ïa kita ki snap mynnor. Ban wanlam ïa ka jingshisha katkum u diengkot ba lah ban pdiang ka juk mynta ym dei kaba suk, kumba u diengkot mynnor ym lah ban khajoh ki parabynriew ha kata ka juk, wat lada ka la urlong mynta. Ban phai biang sha ka mynnor ym myntoi namar ki longshwa manshwa ki lah leit shiryta, bad dei hangta ba donkam ban don kano kano ka ladpdeng ban ïa khana hapdeng kiba mynta bad kiba mynnor. Na kata ka daw la mih ki riewtymmen lane wat ki khyllung riewblei lane ki khynnah sanla bad rangbah kiba don ka sap ban khana parom bad ki mynsiem riewblei lane bad ki mynsiem jong ki longshwa manshwa ba la leit noh. Hynrei ha ka juk tynneng khyllah, ka leh mynleh bad ka thok ka shukor, lah ban don kiba shu kam ba ki nang ban ïa kren ïa khana bad kum kita ki mynsiem riewblei, da kaba shu pynbieit ïa ki paidbah. Hynrei kiba don shisha kum kata ka sap kim donkam ban da kam ba ki lah namar ba kaei kaba ki leh ka kham shynna ban ïa ka ktien ba batai. Tang ka sap ruh ym pat biang, ka donkam ruh ka jingmlien bad marmlien barabor khnang ba kata ka sap tynrai kan nang pliah bad janai, haduh ba ki paidbah ruh ki skhem ka jingngeit ban shaniah ha ki.
Ka ju don ka jingong ba hyndai ka pyrthei ka dang hok, hynrei mynta kiei kiei baroh ki la kylla. Ban sngewthuh ïa kata ka bynta dei ban ngam jylliew bad tih sani ïa kiei kiei kiba dei ban sngewthuh ia ka rukom pyrkhat jong ki briew ha kata ka juk. Kane ka jingong ka lah ban long kaba shisha bad ka lah ban long ruh kaba tang shibynta na ka jingshisha. Ki briew bahok bashida ki don mynnor bad ki don mynta ruh. Ki don ruh kiba sniew na ka mynnor kiba kham shyrkhei ban ïa ki riewsniew ka juk mynta. Kumta ka imlang sahlang ka neh kumjuh naduh mynnor haduh mynta ban don la ka bhah hapdeng ki riewhok riewshida bad ki riewsniew riewsmeh, ha kaba ka pansara ka pher na ka juk mynnor bad ka juk mynta. Ka jingïatyngkhuh jong ki briew para briew ruh ka dei kawei na ki daw ba lah ban kylla ka jing-long briew la ha ka shimet lane kum ka kynhun ha ka imlang-sahlang. Ka jingkhleh khawlang bad kiwei kiwei ki jaitbynriew ruh ka wanlam ïa ka jingkylla ha ka pyrkhat briew lada dei shimert ha lade lane lada dei kum ka kynhun ha ka imlang sahlang. Ka bor pyrkhat briew ka don la u diengkot ban pynshong ñia ïa ka jinglong jingman ha ka imlang sahlang da ka bor shemphang shimet lane ka pyrkhat lang kum ka kynhun.
