D H Kharkongor
Nga ngeit ba uba bun u la nangshai uei uta u Ishmael bad uei uta u Isaac kat ban kubur bad nga ba u Ishmael u dei u Islam katba u Isaac pat de u dei u Jew ne u Israel. Nga ngeit namar kata ba uba bun u lah nangshai uei une u ‘Ayatollah’, u Ali Khameneilem bad ka ‘Iranian Republican Guard Corps’ (IRGP) ka jong u, kata, nalor ka jingïadei kaba rieh ka jong u bad ki HOUTHIS, ki HAMAS bad ki HIZBOLLAH. Nga ngeit ruh ba uba bun u la nangshai kaei ka ‘Temple Mount Brigade’, ba la lamkhmat da uta u Rabbi Shimshon Elboin, lem bad ia ka jingthmu ka jong ka, kata, ka jingpyrshang ban tei ïa ka ‘Temple kaba Lai’.
Kane ka jingïaleh ka la neh mynta palat shitaïew. Ym artatien ba ki ‘nam ding ne ki ”Missiles (bapher bapher) lem bad ki ‘drones’, ki jong ka Iran, ki la nang duna duna kat nang ïaid kane ka jingïaleh. Ka long kumta wei haba ka Iran ka la shu therpuk puk, ther lynter tait bad ther pat ruh naphanglin ïa ka Israel. Kaba katno tam wei ba ka Israel ruh ka iohlad ban ther pynjulor naduh ïa ki ‘Missile Launching Systems’, ïa ki kut kynshew ‘Missiles’, tad haduh ïa ki jaka ba ka Iran ka shna kyrpang ïa ki ‘Missiles’ ki jong ka. Ka Iran pat ruh kam banse ban leh kumta. Lada kam leh kumta ki katto katne ki ‘Missile’, kiba ka ther, kin nym ïoh lad ban ïaid lait ne prong lyngba ïa ka ‘Iron Dome’ jong ka Israel.
Ka la ther shisha naphang, wat ïa ki jaka kiba kam dei ba kan ther. Hynrei kam long kumta bad ka Israel. Ka Israel ka ther beit thik tang ïa kiba ka dei ban ther. Ka jingïaleh jong ka Israel ka long beit thik pyrshah ïa ka ‘Iran Revolutionary Guards Corp’ (IRGC) ka jong une u Ayatollah, u Ali Khamenei, kata, ban khang lad ne ban pynpulom beit noh ïa ka jingthmu kaba sniew bad kaba shyrkhei ka jong u pyrshah ïa ka Israel bad ki jaitbynriew Jew.
Ka Israel kam banse ban shim ïa kat kane ka sien jam. Kam banse naba kam long shuh ban nang pynslem. Kam don shuh hi ruh da kawei pat de ka lynti. Kane ka dei shisha kata ka ‘Operation Rising Lion’. U Sing (Israel) um banse ban ïengkynsan kynsan joit bad ban kynrup syndon hi ruh trait, ïa u nongshuh uba paw u jong u. U Sing um banse wat ban rai kut, wat ïalade. Ka lsrael kam banse wei ba u Ayatollah u la nang pynbit pynbiang sop shi sop ïa ki atiar Nuclear da kiba un pynlko hi phom ïa ka Israel, kumba u ju ïai byrngem byrsit. Ka Isreal kam banse wei ba u Ayatollah u la nang noh tymmen bad um kwah ban khlad noh nangne na sla pyrthei khlem da pynduh pyndam shisyndon, kumba u ju angnud, ïa ka Israel nangne na sla pyrthei. Kane kaei-kaei ka hap ban jia ban pynurlong ïa kaba la dep ban ïathuhlypa. Kan jia ruh de thik kumba la thoh ha ka ‘Jingthoh kaba Khuid’, ka BIBLE.
Ngan nym sngewphylla lada kane ka jingïaleh hapdeng ka Israel bad ka IRGC kan nangjur. Ngan phylla pat lei wei haba ka la sdang bad ba ka Israel ka da thmu haduh ban da shim syndon (assassinate) ïa ka jingim ka jong une u Ali Khamenei (Ayatollah), uba ha kajuh ka por u dei u ‘Khliehduh jong ki Shit Niam Islam (Shiite Muslim)’ bad ym tang u Khliehduh jong ka Iran. ïa mynta ka Israel ka dang shu pynkhrew pyndkoh shwa ïa ka IRGC, kata, da kaba ka pynleit shisyndon ïa ki Khlieh Nongïalam, ki bapher bapher, ki jong ka. Ha ka juh ka por ka la pynleit shisyndon ruh de ïa ki ‘Nuclear Scientists’ kiba ym banse ban ïadonbynta bad ka ‘Nuclear Programme’ jong ka IRGC. Ym tang kumta ka da ther tyngeh syndon hi ruh ïa ki ‘jaka ne ki jingtei kiba kyrpang’ kiba ka IRGC ka pyndonkam ban pynurlong ïa ka jinglah ban don ïa uta u atiar ‘Nuclear’, da uba kan pynlko hi phom ïa ka Israel.
Ka jingïaleh jong ka Israel kam dei bad ka jaitbynriew Persia ne bad ka ri Iran ne bad ki Shiite Muslim hynrei thik pyrshah ïa u Ayatollah bad ka IRGC ka jong u. Kiba bun napdeng ki jaitbynriew kiba don hapoh ka ri Iran ki sngewthuh shai ïa kane. Kiba kham shlur napdeng jong ki ki da kyrshan bad iaroh pynban, haba paw haba shai, ïa kane ka jingleh jong ka Israel. Ki da kren shai ne pynpawshai ba ki lah ngiah ki lah-kdang hi shoin ïa ka jingban beiñ ka jong u Ayatollah ïa ki, kata, lyngba ka jingsynshar donbor ka jong u. Ki arngud hir-hir ïa ka jinglaitluid na ka jingsynshar donborbad na ka jingpyrkhing kaba palat pud ka jong u ‘Ayatollah’, uba dei u shit niam ne u buaid niam. Ki thrang ruh de ïa ka jingïashongsuk hapdeng ka Israel bad ka Iran.
U Ayatollah u dei uta u buaid niam, uba khim naduh ka jingmut jingpyrkhat tad haduh ka mynsiem, uba khohñioh ba ka pyrthei kan ithuh ïa ka Israel kum ka ri kaba kyrpang jong ki Jew. Ki don baroh 22 tylli ki Ri Arab bad haduh 52 tylli ki ri Muslim pynban u dang pihuiñ ïa ka Israel, kaba rit tang shi troh, kat ban thmu pynduh pyndam shisyndon ïa ka nangne na sla pythei. U da khmih lynti ba baroh ki ri Arab bad ki ri Muslim kin don ym tang ïa ka juh ka pyrkhat pyrdaiñ hynrei wat ïa ka juh ka mynsiem ne ka jingthmu kaba kum ka jong u.
Kiei kiei kin jia thik kumba la ïathuhlypa bad thoh shai ruh de. La katta ngin ïa kyrmen ba ka Israel kan nym hap ban raikut syndon da ka ‘Samson Option’. Ngan ieh pat ha phi ba phin ïa wad jingtip ka dei kaei kata ka ‘Samson Option’ bad u ‘atiar’ jong ka.
