Ka ktien u Blei ka ong, Te ym don uba la leit kiew sha bneng (Ioannis 3 : 13). Kane ka pynpaw ba baroh ngi ki briew kiba la iap naduh ka por u Adam haduh kine ki sngi, ym pat don uwei ruh uba la leit kiew sha bneng. Baroh kiba la iap ki dang sah hapoh ka khyndew hapoh ka dewmet. Dei tad ha ka sngi bishar ne ka akher ka sngi ba ki jingtep kin ang bad kiba iap kin sa mih pat na ki lum jingtep. Ha kata ka jingmih pat U Jisu ki jingtep kin ang bad shibun ki met jong ki riewkhuid kiba la iohthiah kin sa mih pat.
Ka ktien u Blei ka ong ruh, lada uno uno ruh un sumar ia ka ktien jongnga un ym mad ia ka jingiap lano lano ruh (Ioannis 8 : 52). Ngi ki briew ngim sumar thikna ïa ka ktien u Blei. Kumta ngi mad kein ïa ka jingiap. Ngi shu ïaroh, duwai bad phla ïa ka ktien u Blei tang da ka rmiang shyntur, kumta ngi hap ban mad ïa ka jing-iap. Kane ka jingpynpaw shai ba ym don kiba sumar hok ïa ka ktien u Blei bad kumta ngi iap keiñ. Hynrei lada ngi sumar ïa ka ngin ym mad ïa ka jingiap lano lano ruh.
Ki nongïalap niam ruh kim sumar ïa ka ktien u Blei, kumta ki ioh ïa kajuh ka jingiap kum kito ki bym ju sumar ïa ka ktien u Blei. Ha ka jingshisha kum ki riew ngeit khristan ngi dei ban sumar bha ïa ka ktien u Blei ban lait na ka jingiap, hynrei ym don kiba sumar kumta baroh ngi ioh mad ïa ka jingiap kum ki briew.
C. B. Iawphniaw
