Bertina Lyngdoh
Phi dei u dak ka jingkyrmen,
Ka jingshisha ym ka shu kren;
Ha man ba phi mih paw,
Phi pashat ki jingkynmaw.
La saw, umsoh, jyrngam bad blu,
Bunsien ïa phi ngi kynhuu;
La stem, indiko, bad violet,
ïa ka jingdon jongphi, ngim dei ban klet.
Phi dei u jingthaw ba im ka meimariang,
Ba haba phi mih paw, i’u briew phi ring phi khriang;
Ka nuksa te phi dei,
Ba i’u briew phi btien sha ka lawei.
U simpyllieng ba bun ki rong,
Ba jingkyrmen te briew un ioh phong;
Phi dei u dak ka jingkyrmen,
Ba ha phi te dei ka jingkyrmen.
Haba ïa dei bad kane ka phangpdeng, man u briew u donkam ïa ka jingkyrmen, bad long kaba kongsan bha ïa u ba un im ha ka jingkyrmen. Ban long barabor uba palei, u briew u donkam ïa ka jingsuk, ka kamai ban im, ka pule puthi ban phong ïa ka jingstad, ban ym thame ha ki rong ka pyrthei,ban tieng burom la kmie la kpa, bad kaba kham kongsan ka dei ka jingioh ban kynjoh ïa ka thong. Kam long pat kaba suk ïa u briew ban im sah ha ka jingkyrmen, naba ki jingeh ki ïai ban na kawei sa ha kawei pat. Kine ki long ki katto katne ki daw kiba pynduh jingkyrmen ïa u briew:
Ka jingbym ïaid bha ha ka pule puthi, ka jingbym biang ha ka kamai ka kajih, ka jingduna ha ka jingkyrshan, bad ka jingbym sngewthuh ha ka imlang sahlang. Namar kine ki jingeh, u briew bunsien u im sha jngai na ka jingkyrmen. Ynda haba u im kumne, u sngew ba wat u blei ruh u khlem bynta ei ei ïa u. Ynda haba u iohi ba kiba ioh te ki nang ioh, katba ha u pat uba duh, te u la nang duh. Kumta, u im jew mynsiem, ha la ïing la sem kumjuh ruh ha ka imlang sahlang. Bad dei namar kane, ka ktah keiñ khamtam eh ïa ka koit ka khiah jong u.
Namarkata, ha ba u simpyllieng u don ïa ki hynniew tylli ki rong, kaba mut ba ngi ki briew ruh ngi don shibun ki jingtynjuh kiba wan ha ka jingim jongngi. U simpyllieng u dei u jait jingthaw ka mariang kaba pyni ba kum ki briew bunsien namar ki jingtynjuh, ngi im hapdeng ka jingkyrmen bad jingduh kyrmen.Te namarkata, man ki jingthaw ba im ka meimariang, ki don ia ki jinghikai ba ki pashat sha u briew bad ba briew u dei ban shim ïa ka nuksa na ki.
