Kum ki briew kiba im ha kine ki sngi ngi kham jied bad kyntait sharud ïa kaba bha. Ngi kham jied ïa ka jingsniew ban ïa ka jingbha. Ka ktien u Blei ruh ka ong, hynrei ki mane thala ïa nga haba ki hikai ki jinghikai ïa ki hukum jong ki briew bad ki Balang bad ngi iehnoh ïa ki hukum u Blei (Markos 7 : 7). Ha kine ki sngi ki briew ba shait mane blei bad ngeit ha ka Baibl kum ka ktien u Blei hynrei ngim leh pat kumba hikai ka Baibl. Bun ki nongïalap ki ïalap kam ïa dei bad ka ktien u Blei. Kane ka long ba ki hikai lamler ïa ki briew. Ki briew ki shu iohsngew na ka jingïalap niam ban ioh leit sha bneng ban ioh jingpynim. Hato tang ban leit sha jingïaseng ngin ioh jingpynim ? Em, ka ktien u Blei ka ong, dei tang uta uba leh ïa ka mon u Blei kin ioh lait im. Kumno ngin leh ïa ka mon U Blei, ka long ba ngi dei ban koh-nguh ïa ka hukum u Blei. Kata ban ieid ïa U Trai uba u Blei jongme da ka dohnud jong me baroh bad da mynsiem jongme baroh bad da ka bor jong me baroh. Bad wat pynsyriem ïalade bad kane ka pyrthei bad pyrshah ïa ka hukum u Blei (Rom 12 : 1 -2). Bun ngi sngewtynnad ïa ka jingïaroh jong ki briew ban ïa ka jingïaroh jong u Blei. Kum ban shu ong noh hangno ba la ai bor na ka ktien u Blei ïa ki kynthei ban kren ha ka balang ne ban ïaleh drama. Ka ktien u Blei ka ong, to ai ba ki kynthei jongphi kin sngap jar ha ki balang, namar ym shah ïa ki ban kren. Namar ka long khlem akor keiñ ïa ki kynthei ban kren ne ïalap ha ka balang (I Kor 14 : 34 – 35). Dei kane keiñ ba ngi shait kyntait sharud ïa kaba bha.
C. B. Iawphniaw
