Raphael Warjri
Ki kyntien ba la shim kylliang bad kylla long ktien Khasi lah ban jer kum ki kyntien- synduk, miej, shuki, junom, shini, mithai, tala, shabi, surok, tyrsok, khulom, kot, khalki, shatri, shamoit, shaka, kali, almari, karkhana, tiewkulab, sharak bad ter ter kiwei kiwei kiba dei shim kylliang na ka ktien Hindi bad Bangla. Nangta ki kyntien- skul, kolej, pin, tin, klip, taksi, phralen, merina, ben, stul, lait, laiñ, plastik, bitor, bilor, phutbol, dro, droks, klat, dot, ak, kudam, lynten, ketli, tiewlili, kak, saiñ, bad kiwei kiwei ter ter ki dei ba shim kylliang na ka ktien phareng (English). Ki don ruh ki ktien ba ym lap dien trai shuh la ki dei ki ktien tynrai ne shim kylliang lane ki lah ban dei ka tyllong na ka ktien Persia ne Urdu lehse, namar ba dang artatien kum ïa ki kyntien- Ïit, kurat paiñtali, rynda, matang, pela, peris, kotkudi, duli, prek, biar, sia bad kumta ter ter. La kumno kumno kine ki ktien ki dei kiba la longdoh longsnam ha ka ktien Khasi bad la jwat ban weng namar ba la ïa sngewthuh paidbah shityllup. Ka ñia ba la kdew bad said ksan ka long ba ïa ki kyntien kiba dei ïa la ka thymmei bad kiba khia thew ha ka jylli jong ka riti dustur, ka niam ka rukom, ka pyrkhat pyrdaiñ, ka longbriew manbriew ter ter la sngew dei ban pynneh da la ki ktien tynrai, lada dei kiba ïa sngewthuh paidbah lane dei kiba yn shna thymmai, kumjuh ruh lah ban dei ba la ñiar ban pyndonkam bad la tyllep noh da ki ktien ïapan. Hynrei ïa ki ktien ki ba synlar kiba ym da dei eh kiba khia thew ha kano kano ka jylli jong ka imlang sahlang te ym da pher palat ban pynneh da kiba la sngewthuh paidbah bad la pdiang kum ka ktien Khasi lajong. Toi la dei pat ban khmih sani ïa ki ktien ba synlar makna kiba lah ban pakhuh bad ki ktien tynrai Khasi kiba kit jingmut da kumwei khnang ban ym kulmar ka thoh ka tar, kan bha ba thaw thymmai.
Kumta la dei ban ïatai ïathir bha ïa ki ktien nongwei ba lah pyndonkam salonsar ha ka imlang sahlang kiba lah ban ïa sngewthuh paidbah. Ha kane ka rukom don ki ktien ba lah ban pakhuh bad kulmar pynban, ha kaba la dei ban husiar. Ki ktien ïapan na ki ‘tien nongwei kiba lah pyndonkam khah khah bad sngewthuh da uba bun ba lang ki don byllai. Don kiba neh tang ha kren ka khana bad don kiba la pyndonkam ha ka thoh ka tar ruh. Kumjuh ruh don ki ktien tynrai Khasi kiba don ar jingmut ne palat ba ïa pakhuh ha ka thoh ka tar. Katto katne na kita ki ktien ki long :
Katto katne ki ba pyndonkam tang ha ka kren ka khana :
Fresh (phresh) kaba mut Ba dang im khriak khriak
Compare (komper) – kaba mut Ïa nujor
Experience (ekspirians) – Ba lah mlien
Flop- (phlop) kaba mut Bijai ne sep ei
Point (poiñ)- kaba mut tduh, mat, thew, dorthong
Spare (sper)- kaba mut Ban buh lypa, khreh lypa, pynap
Dot (dot) kaba mut U phngit symbai barit ria shi tylli.
Clip (Klip) kaba mut Khnap lane nap pyndait shñiuh ba rit ba stang.
Act (ak) kaba mut Ba leh myn leh, pyrthuh jingleh jong kiwei.
Dost (dos) – kaba mut Paralok ha ka ktien Hindi
Taxi (Taksi) kaba mut Ka markor ñiah shalyntem ba kitnong leit lynti ïa ki paidbah
Choice (shois) kaba mut Jiedmon.
Driver (draibar) kaba mut Majikor- u maji ba ñiah ïa ka kynja kor shalyntem
Trace (tres) kaba mut Ba paw ne ïohi lyngba, ba pyrshi
Loose (lus) kaba mut Ba kylluid ka jaiñkup jaiñphong
Try (trai) kaba mut Ban pyrshang
Shock, Chalk (shok) kaba mut Kyndit tyngeh, Mawthoh
Sign (saiñ) kaba mut Soi kyrteng ha ka dulir, dorkhas, kyrwoh ter ter
Step (mawkyndon) kaba mut Mawjingkieng mawkyndon ba kiew ba hiar
Kaba ma ïa kine ki ktien nongwei ba la pyndonkam kum ki ktien kren ha ka Khasi, ka long ba kiba bieit ba them ki ba khlem leit skul ki sngewthuh kumba ki dei ka ktien Khasi tynrai. Kumta kan long kaba lymbiang lada ka kylla ka ktien thoh hadien habud. Ka wei pat ka long ba ka rukom kynnoh ka lah ban ïa pakhuh bad ki ktien tynrai kiba kit jingmut da kumwei bad lah ruh ban don kawei ka ktien ka bakdew ïa shibun ki jingmut.
Katto katne kiba la pyndonkam ha ka thoh ka tar ruh, bunsien dei kiba la shu kynnoh da kaba pule ïa ka sur na ka ktien phareng (English) ne Hindi, Bangla:
Drugs (droks) – kaba mut U kynja aphin, kani ne kuli dawai pynbuaid
School (Skul) – kaba mut Ka ïing ka sem hikai thoh hikai pule
Draw (dro) – kaba mut Ruid dur ruid dar
Spell (spel)- kaba mut Ban pule kyntien na ki dak thoh
Glass (klat) kaba mut Tyndong dih um, Khuri, Jhoh (Bhoi)
Pin (pin) kaba mut Narsuh, nardung
Godown (Kudam) kaba mut Khrum buh lane set tiar, kynshew nongra.
Lantern (lynten) kaba mut Sharak ne dingkum
Kine ki ktien ba la kdew haneng ki dei kiba long synlar bad madan, ym ki ktien kiba khia thew bad kynsai ha ka ktien tynrai Khasi. Kumta lada ki dei kiba la myllen ban pyndonkam ha imlang sahlang lah ban pdiang kum ki ktien Khasi ba ka tyllong dei na ka ktien nongwei. Ki long ki ktien ba ïakren ïa khana sharum shaneng ha lynti syngkien ha ïew ha hat, kumta ym da pher than. Hynrei lada dei ïa ki ktien kordor bad kynsai ha ka ktien tynrai te dei ban kham tyngkan ban shu shim kylliang ne tynneng na ki nongwei. Hynrei la ïeh ha ki iktiar ba dei khmih ïa kane ka phang ban ai ka rai kaba shongñia.
