Shillong, Naitung 07
Ha ka jinghap slap kaba jur ha ka por shiteng miet ha Mandi District, Himachal Pradesh, iwei i khyllung ba dang 11 bnai i la lait im na ka twa khyndew, hynrei ka kmie, u kpa bad ka meiied jong ine i khyllung pat ki la khlad noh.
Kane ka jingjia ka la jia ha ka por 1 baje mynstep, hynrei la lap ïa itei i khyllung ha ka step phyrngab hapoh ïing katba i dang ïohthiah bad i khlem shah ktah eiei na katei jingjia.
Katkum ki khubor ba la ïoh lum na ka NDTV, la ong ba u slap uba jur u la rung shapoh ka ïing kaba ki sah kaba pynlong ïa u kpa, u Ramesh Kumar, ka kmie, ka Radha Devi, bad ka meiieid, ka Poonam Devi ban mih sha madan ban pynkynriah ïa ka um kaba rung ha ïing. Ha kane ka por, ka khyndew ka la twa bad ka la hap bad kitei ki lai ngut ki la khlad noh.
Ki para shnong kiba sah ha syndah ki la wan ban peit ha ka por 2 baje shiteng miet bad lap ba i khyllung marwei i la thiah ha ïing.
Katba ïa ka met u Ramesh la shem, ka kynhun SRDF ka dang pynlong ïa ka jingwad ïa ka Poonam bad ïa ka Radha.
U kñi jong itei i khyllung u la pyntip ba ki la ïoh bun ki phone call ban aiti ïa itei i khyllung, hynrei u la ong ba kim ai ïa i shano-shano bad kin ri bad sumar ïa i.
Katkum ka State Disaster Management Authority SDMA, haduh mynta la don 78 ngut kiba la khlad naduh ba sdang u lyiur ha ka 20 tarik Jylliew, kynthup 50 ngut ha ki jingjia ba wanrah da u slap kum ki jingtwa khyndew bad ka jingshlei um. Ka Mandi ka long ka district kaba la shah ktah tam.
Ka India Meteorological Department ka la pynbna ka jingma halor ka jingwan ka jingshlei um kaba jur ha 10 tylli ki district ha kane ka sngi.
