Shillong, Naitung 07
Kum shibynta ban pynpaw ka jingsngewlem halor ka jingshah pynïap ka samla Phyrnailin Kharsyntiew kaba dei na ka shnong Mawkhapkhwa kaba hap hapoh Mairang, West Khasi Hills kaba la shah pynïap ha u Roberto Marngar ha ka jaka pynïeng kali ha Mairang ha ka 30 tarik u bnai Jylliew, 2025 ha ka por kumba 4 shiteng baje janmiet, ha ka Lah Sngi U Blei ka 7 tarik Naitung, 2025, ka Dorbar Shnong Wahrit Pyllun ki la pynlong da ka jingïai paidbah kaba jai-jai ban pynrem jur ïa utei u briew uba la dkhat jubor ïa ka jingim jong katei ka samla.
Ha kane ka jingïaid paidbah, ka la don ruh ka jingrah ïa ki jingthoh ne ‘placard’ ban pynrem ïa utei u ‘riewthrang snam ha ryngkat ka jingpyrta ïa ki sur pynrem bad ban dawa na ki bor ka aiñ ban pynshitom da kaba tyngeh ïa une u briew.
La wan ban ïashimbynta ha kane ka jingïaid paidbah naduh ki khynnah skul, ki nongshong-shnong na ki shnong marjan, ki sengbhalang, ka Kur Kharsyntiew, ki Nongmihkhmat bad kiwei-kiwei.
Haba ai jingkren ha katei ka sngi, u MDC ka Parïong-Mawthadraishan, Bah Powell Sohkhlet, u la ong ba kane ka jingmih paidbah kan ym kut tang ha ka jingïaid paidbah ne ban rah ïa ki kyntien pynrem pyrshah ïa utei u runar hynrei ka jingdawa ka long ba dei ban set patok shi jingim ïa u Roberto Marngar.
U Bah Powell u la ong ba kane ka jingjia ka dei ka jingjia kaba sngewsih bha ïa ka ïing ka sem jong ka samla Phyrnailin baroh kawei da kaba ïaroh ruh ïa ka Dorbar Shnong kaba la trei shitrhem ban ïeng ban ïaleh pyrshah ïa ki kam sniew.
“Ki jingsniew baroh ki jia ka dei namar ba ma ngi ha kiba bun ki khep, ngi sngap jar bad ngim ju mih shakhmat ban pyrshah,” ong u Bah Powell.
Na ka liang ka Seng Kynthei jong ka Pyndenumïong ka la pynpaw ka jingsngewsih kaba jur halor ka jingshah dkhat jubor ka jingim jong ka samla Phyrnailin bad ong ba ka samla Phyrnailin ka dei ka samla kaba bha ha ka jinglong jong ka.
Da kaba kyntu ruh ïa ki kmie-ki kpa jong ki samla ba kin long kiba husiar bad phikir bha ïa ka ïaid-ka ïeng ki khun-ki kti jong ki khnang ba kan ym wanrah kano-kano ka jingjia kaba sngewsih hadien-habud.
Na ka liang u President ka Kur Kharsyntiew Mairang Unit, u la ong ba kum ka kur bad ki paidbah ki kwah ïa ka jingbishar kaba hok da kaba ïawer lem ïa ki paidbah nongshong shnong ba kin ai ïa ka kti kadiang-kamon ban ïatreilang haduh kaba kut.
