Shillong, Naitung 08
U ‘rang ïalehkai ka Jylla, Bansahnam Nongbet u la wanrah burom da kaba khur kawei ka takma rnong ha ka 24th National Junior Wushu Championship kaba dang kut shen ha Rajeev Gandhi Chowbowli Indoor Stadium kaba ha Telengana.
Wat la ka Meghalaya Wushu Association (MWA) ka la phah haduh 9 ngut ki nongïalehkai, hynrei tang utei u ‘rang ïalehkai uba dang pule klas-XI ha St. Francis Higher Secondary School kaba ha Smit, East Khasi Hills District, uba la lah ban khur ïa katei ka takma.
Halor kane ka jinglah ban wanrah burom ïa ka Jylla, na ka liang ka MWA lyngba u General Secretary Bah Jerry Fiscal Wankhar, u la pynpaw ka jingai khublei ïa u lem bad kiwei pat ki nongïalehkai ba kin dang ïai trei shitom nangne shakhmat khamtam eh haba ka Jylla ka dang pynkhreh ïa ka 39th National Games 2027 ka ban long ha ka Jylla Meghalaya.
