Shillong, Naitung 08
U President ka Hyn-ñiewtrep Youths’ Council (HYC) West Khasi Hills District, Bah Lumlang Kharsyiemlieh, u la phah ïa ki dkhot ba kin leit peit ïa ka jingthung mawpud u Himanta Biswa Sarma, Myntri Rangbah ka jylla Assam ha Hahim, Kam-rup District hadien ba la dep pynbeit pud bad ka jylla Meghalaya.
Haba ïoh ban ïakren bad u Bah Lumlang, u la ïathuh ba ka seng ka dang phah wad jingtip la une u mawpud ba la thung da ka Assam ka tam pud ne em sha ki jaka jong ka Meghalaya namar lada ka Assam ka dang tam pud ka seng ka hap ban shong pyrkhat hynrei lada ki la thung katkum ba la dep pynbeit kata ka la biang.
U la ïathuh ruh ba ka seng ka dang wad jingtip la ka Sorkar Meghalaya ka la dep thung ne em ïa u mawpud kumba la dep thung ka Assam namar lada ka Meghalaya kam pat thung mawpud kam pat don ka jingshngaiñ namar ka Assam kan kyntur biang hadien.
Haba kylli kumno ka seng kan leh lada la dei sa ka pali ha Langpih Sector, u Bah Lumlang u la ong ba ka seng ka dawa beit ba Sorkar Meghalaya ka dei ban pyneh beit ba ki shnong Khasi kiba sah ha ki jaka ïakajia ki dei ban hap beit ha jylla Meghalaya. U la ong biang ba lada ïa ki shnong Khasi ka Sorkar Meghalaya ka phah hap ha Assam kata ka la hap ban ïakhun tyngeh.
U la ong ba lada ki Nepali kiba don hapdeng ki kwah ban leit sha Assam kin mih noh na Meghalaya lada kiba bun ki shnong Khasi ki kwah ban hap ha Meghalaya.
Shuh shuh u la pyntip ba haduh mynta ka Sorkar Jylla kam pat sdang ïa ka Langpih Sector hynrei ka dang shu twad jingmut.
Kum ban shu pynkynmaw, u Himanta Biswa haba u pyllait ïa ka jingthoh ha social media u la ong ba ka jingthung ïa ki mawpud ha ki jaka ba la dep pynïabeit ka Assam bad Meghalaya u dei u mawpud jong ka jingshai bad jingsuk.
Shuh shuh kum ban pynkynmaw biang ha ka jingpynbeit ba nyngkong ki don haduh hynriew tylli ki sector ba ka Sorkar Meghalaya bad Assam ki la lah ban pynbeit ïa u pud ha ka 29 tarik Lber 2022 kine ki kynthup ïa ka Hahim, Gijang, Tarabari, Bakalapara, Khanapara-Pilinkata bad Ratacherra.
Katba ha ka bynta ba ar jong ka jingpynbeit ïa u pud ka dang don ha ka jingïakren kaba kynthup ïa ka Block-1,Psiar-Khanduli kaba hap ha West Jaiñtia Hills, ka Block-II, Borduar, Nongwah-Mawtamur bad Deshdoomreah kiba hap ha Ribhoi District bad Langpih kaba hap ha West Khasi Hills District.
