Shillong, Naitung 09
Ka Sorkar Jylla ka la rai ban tei 2 tylli ki 5 Star Luxury Resort, kata kawei ha Umïam, Ri-Bhoi District bad kawei ha Sohra, East Khasi Hills, bad ka la rai ruh ban pynthymmai ïa ka Polo Orchid Tura ha West Garo Hills.
Kane ka long kum shi bynta ban pynbha ïa ki jaka sah jong ki nongwan shangkai pyrthei khnang ban nang khring shuh-shuh ïa ki nongwan shang kai pyrthei sha kane Jylla.
Ïa kane la pyntip da u Myntri ba khmih ïa ka tnat Tourism u Bah Paul Lyngdoh bad u la ïathuh ba ïa kane ka rai la shim ha ka jingïalang ba la khlieh da u Myntri Rangbah ka Jylla u Conrad K Sangma.
Haba kren sha ki lad pathai khubor, u Bah Paul u la ïathuh ba ka Sorkar ka la jam shakhmat ban pyntrei da ka PPP Mode ïa ki projek ban kyntiew ïa ka kam jngohkai pyrthei hapoh ka Jylla.
U Bah Paul u la ïathuh ba na ka bynta ka 5 Star Luxury Resort ha Sohra, ka Sorkar ka la dep ban ithuh ïa ka jaka marjan bad ka Jeeva Resort kaba dei ruh ka jaka jong ka tnat Tourism kaba heh 25 akar ha kaba la dep ban aiti ka jaka kaba 5 akar ban sdang pyntreikam noh mynta u snem.
U la ïathuh ba ïa ka 5 Star Luxury Resort ha Sohra yn pyntrei lyngba ka PPP Mode bad ka Hills and Canyon Hotels Private Limited kaba dei ka kompani jong ka IHG Hotels & Resorts.
Haba ïadei bad ka 5 Star Luxury Resort ha Umïam, u Bah Paul u la ïathuh ba ka tnat Forests and Environment ka la dep ban aiti ïa ka jaka kaba heh ym duna 300 akar sha ka tnat Tourism. “Mynta ka kynti ka Sorkar kan tei ïa ka 5 Star Luxury Resort ha Umïam ka ban ïahap kyrdan bad kiwei ki Resort ha kylleng ka pyrthei,” u la ong.
U Bah Paul u la ïathuh ba ka tnat Tourism ka la ïoh ruh ïa ka dewlynnong (Island) kaba heh 36.78 akar ïa kaba la pyntreikam da ki ‘riewshimet ha ki snem ba la dep bad mynta ka tnat Tourism kan sdang noh ban leh ïa kaba donkam ban khot tender ban sdang pyntrei noh ïa ka Resort.
Haba ïadei bad ka thaiñ Garo Hills, u Myntri u la ïathuh ba ka tnat kan maramot bad pynthymmai noh ïa ka Polo Orchid Hotel Tura da kaba pynbun kumba 100 tylli ki kamra ha kane ka Hotel khnang ban lah shuh shuh ban khring ïa ki nongwan shangkai pyrthei sha kane ka thaiñ.
U Bah Paul u la ïathuh ba ïa kine ki projek jong ka tnat Tourism la kyrshan bad bei tyngka da ka Meghalaya Industrial and Investment Promotion Policy (MIIPP) bad ka Northeast Industrial Policy (NIP). “Kine ki projek kin ïarap ïa ka Meghalaya ban pynlong kum kawei ka Jylla hapoh ka ri kaba lah tam ban khring ïa ki nongwan shangkai pyrthei na kylleng ka pyrthei baroh kawei,” u la ong.
