Shillong, Naitung 09
Ka Hynñiewtrep National Youth Front (HNYF) Seng -kmie ha ryngkat ka HNYF Jaiñtia Hills bad ka Hyn-ñiewtrep Border Dispute Redressal Forum (HBDRF), ha ka 9 tarik u bnai Naitung, 2025, ka la leit ban ïakynduh ïa u Chief Executive Member (CEM) ka Jaiñtia Hills Autonomous District Council (JHADC), u Ma Thombor Shiwat ban buddien halor ka jinglong-jingman jong ki shnong kiba don ha khappud khamtam hapoh ka Block-1, ka jingithuh noh ka Sorkar Meghalaya ïa ki paradoh parasnam kiba don ha khappud bad ruh halor ka jingïai bteng ka jingshah banbeiñ jong ki paradoh-parasnam kiba don ha kitei ki thaiñ.
U President ka HNYF Sengkmie, Bah Sadon Blah u la ong ba ha ki 2 snem mynshwa, ka JHADC ka la ithuh ïa ki shnong ha khappud lyngba ki Syrnod hynrei da ka jingithuh bad ka jingpynkhie im biang ka JHADC ïa ka Elaka kaba la ïap noh la kumba 50-60 snem mynta, na ka liang ka Sorkar pat kam shym treh ban ithuh bad kane ka la buh jingeh ïa ki nongshong shnong jong ka thaiñ ha ka liang ki kam pynroi-pynpar, ki kam pule-puthi bad wat ka EPIC ruh kim lah ban ïoh bad baroh ki jingdonkam bad jingmyntoi kiba dei ban ïoh lyngba ka Sorkar Pdeng bad Sorkar Jylla ruh kim ïohpdiang satia.
Nalor kata, u Bah Sadon ula ong ruh ba hapdeng kata baroh, ka don ruh ka jingshim kabu da ki nongpynïaid jong ka Karbi Anglong District Council bad ki riew shim kabu na ka jaidbynriew Karbi kiba pyntieng bad pynsmiej ïa ki jaidbynriew Khasi-Pnar naka por sha ka por.
U Bah Sadon u la buh ruh ka jingmaham ïa ki jaidbynriew Karbi ba lada ki dei na kano-kano ka kynhun ne kino-kino ki seng, hynrei lada ki dang ïai bteng ban pyntieng bad pynsmiej ïa ki paradoh-parasnam kiba sah ha khappud, ki dei ban kynmaw ba ki jaidbynriew Karbi ruh ki bun bha hapoh kane ka Jylla bad ong ba lada ki ïai tynjuh shi ïai tynjuh ïa ki paradoh-parasnam kiba sah ha khappud kan sa poi ka khep ba ym banse ban sa ai noh da kaba tyngeh ïa ki Karbi kat haba ki don.
“Lada phi tynjuh shi tynjuh ïa ki paradoh-parasnam jong ngi kiba shong ba sah hangto, ka mut kan sa poi ka khep ba mangi ruh ngim banse ban hap ai da kaba tyngeh ïa ki Karbi ha katba ki don,” ong u Bah Sadon.
Na ka liang u Bah Chandame Sungoh uba dei u Chairman ka Forum, u la ong ba ha ka jingïakynduh ïa u CEM bad u Deputy CEM ka JHADC, ka jingdawa jong kine ki ar kynhun ka long ba ki la pan ïa ki jingthoh na ka District Council halor ka jingpynim ïa ka Elaka bad ban ai Syrnod ïa u Acting Doloi bad ki Waheh Shnong ha kaba na ka liang ka District Council ka la kular ban ai bad pynbiang ïa ki kot-ki sla kiba donkam.
Shuh-shuh, na ka liang kine ki ar kynhun ki la ong ba hadien ka jingïohpdiang ïa ki kot-ki sla, kin sa leit ban ïakynduh ïa ki Block Development Officer jong ka Laskeiñ Block bad ka Namdong Block na ka bynta ban dawa ba ki shnong kiba don hapoh jong ka Elaka Labang Nongphyllut jong ka Block-1, ki dei ban long noh ki shnong kiba la ithuh da ka Election Commission of India hapoh ka Jylla Meghalaya bad ki tnat treikam Sorkar bapher-bapher, kine ki nongshong shnong ha khappud baroh kin sa ïoh ban pynrung kyrteng ban ïoh ki kot-ki sla ba donkam bad ban ïoh ruh ïa ka roi-ka par napoh ka Jylla Meghalaya.
