Shillong, Naitung 09
Ka All India Football Federation (AIFF) ka sngewkmen ban pynbna da ka khusnam kaba USD 50,000 ïa ki kynhun ‘thei ïalehkai phutbol, hadien ba ki la lah ban ïalehkai bha ha ka lympung ïaknieh rung jong ka AFC Women’s Asian Cup Qualifiers kaba la long ha Thailand.
Ha kane ka lympung ïaknieh ka India ka la lah ban pyni ïa ka mynsiem ïakhun khlem da ailad ban shah rem wat tang shisien ruh. Ka la lah ban pynjem khnap ïa ka Mongolia da 13-0 kol, kumjuh da 4-0 kol ïa ka Timor-Leste, bad ïa ka Iraq (5-0 kol), shwa ba kan pynkut ïa kane ka jingïakhun da kaba ka la lah ban pynliem sa ïa ka Thailand (2-1 kol) na ka bynta ban wan ha kliar duh jong ka Group-B ryngkat 12 point na saw sien ïakhun.
Ha kine ki snem ba la dep, ka AIFF ha ka jingïatreilang bad ka Sports Authority of India (SAI), ka la shim ïa ki katto-katne ki sienjam ban pynkhlaiñ ïa ki jingïalehkai phutbol naduh tynrai bad wat haduh ki kyrdan ba kham heh ha ka liang ki kynthei. Kawei na kum kine ki jingthmu ka dei ka jingïalehkai phutbol jong ki kynthei ïa kaba la tip kum ka ASMITA, kaba la sakhi ïa ka jingpynïaid kaba jop jong 155 tylli ki jingïalehkai ha kylleng ka ri naduh u snem 2023 haduh u snem 2025 ha ka kyrdan Under-13, Under-15, bad Under-17. Ha ka jingïalehkai jong u snem 2023-24 la ïohi ïa ka jingïashim bynta na 6,305 ngut ki nongïalehkai dang khynnah, ka jingkheiñ ka la kiew sha ka 8,658 ngut ha u snem 2024-25.
Namar kum kine ki jingpyrshang, ka jingdon jong ki nongïalehkai phutbol kynthei kiba la pynrung kyrteng ha India ka la kiew da 232 na ka 100 ha u snem ba la dep.
Ka jingpynkhreh jong ka kynhun na ka bynta ka jingïalehkai AFC Women’s Asian Cup Qualifiers ka kynthup ïa ka jingpynkhreh jong ka jingkilanmet kaba la neh haduh 53 sngi, ha kaba ka kynhun ym tang ba ka la ïashim bynta ha ki jingïalehkai kilanmet ha Bengaluru, hynrei ka la ïashim bynta ruh ha ki ar tylli ki jingïalehkai paralok jong ki kynthei jong ka FIFA pyrshah ïa ka Uzbekistan, kaba la ïoh ruh ban rung sha kane ka lympung ïalehkai jong ka dewbah Asia.
Haba phai shakhmat, ka AIFF ka dang ïai shim khia ban pynthikna ïa ka jingpynkhreh kaba bha tam na ka bynta ka AFC Women’s Asian Cup 2026, kaba la buh ban pynlong ha Australia ha u Lber jong u snem 2026. Te kumta na ka liang ka synjuk kan ïatreilang bad baroh ki nongshim bynta ban pynsuk ïa ki jinghikai ba la pynjlan bad ban pynthikna ïa ka jingkilanmet kaba ïaid beit bad ruh ban ïoh shuh-shuh ki jingïalehkai bar ri na ka bynta kane ka kynhun.
Ka jingthmu jong ka synjuk kam dei tang ban pynlong ïa ki nongïalehkai kiba koit bad khiah ha ka met bad ka jingmut jingpyrkhat lyngba ka jinghikai, hynrei ban pynlong ruh ïa ki kiba la pynkhreh ban ïakhun pyrshah ïa ki nongïalehkai ba tbit tam ha Asia. La peit ruh ïa ki lad ki lynti na ka bynta ka AIFF ban pynbeit ïa ki nongïalehkai kiba tbit ban shim bynta ha ki jingïalehkai pynkhreh.
