Shillong, Naitung 09
U Bah Bandari Ryntathiang uba dei President ka Confederation of Ribhoi People (CoRP) u la kyntu ïa ki samla ba kim dei ban ap tang ïa ka kam Sorkar hynrei ki dei ban trei beit ïa ka kam lajong.
Ïa kine ki kyntien u Bah Bandari Ryntathiang u la pynpaw haba u kren kum u kongsan haba sam ïa ki syrnot sha hynriew ngut ki samla kiba la pyndep shah hikai ban pynbhabriew ha Glam Up By Pynhun Beauty Salon kaba don ha Bhoirbymbong, Ribhoi District kaba la long ha ka 9 tarik Naitung 2025 ha ka jingïadonlang ka Kong Pynhunlang Rynjah kaba dei ka trai bad kaba dei ruh kum ka nonghikai. Haba ai jingkren, u Bah Bandari u la pynpaw ka jingai khublei ïa ka Kong Pynhunlang namar haba ka la dep pyntbit ïalade, ka kwah ban ai jinghikai ïa ki samla jong ka thaiñ khnang ban kyntiew lem ïa ki samla kiba wan na longïing baduk ba kin sdang ïa ki kam lajong namar lada kin leit pyntbit sha kiwei ki jaka kin lut bun shah. U la ong baroh ki samla ki kwah ïa ka kam Sorkar hynrei kan shem shitom bha namar ha kane ka juk ka duna ban lait kam Sorkar. Kumta u kwah ba ki samla ki dei ban trei shitom haba ki seng kam lajong khnang ban poi sha ka thong. U la kyntu ïa ki samla ba kim dei ban lehraiñ haba ki trei ïa kano-kano ka kam hynrei ka la dei ka por ban ym shaniah ïa ki briew kiba nabar, hynrei ki samla napoh ka jylla kin trei hi ïa ki kam.
Na ka liang ka Kong Pynhunlang Rynjah ka la kyntu ïa ki samla haba ki la ïoh jinghikai bad ruh ka syrnot, kim dei pat da la poi ha ïing ban buh ha kyndong ne shu bun tang syrnot katba khlem pyntrei ïa ka kam ba ki la ïoh. Ka la ong ba ma ka ruh ka la ïoh jinghikai hynrei ka la pyrshang ban seng ka kam lajong. Kumta ka la kyntu ïa ki ba kin sdang ban seng kam lajong khnang ba kin lah ban ai jinghikai sha kiwei pat.
