Jowai, Naitung 10
Ka samla Olivia Dkhar na ka shnong Khahnar, East Jaiñtia Hills District ka dei ka samla kaba la wanrah nam bad burom ha kiba bun bha ki rynsan ïakhun kti ne Arm Wrestling. Mynta ka kynti ruh ka la wanrah burom ïa ka Jylla ha ka lympung ïalehkai National Arm Wrestling & Para Arm Wrestling Championship 2025.
Ïa kane ka lympung hapoh ka jingpeit jong ka People’s Arm-Wrestling Federation India bad kaba la pynïasoh bad ka Asian and World Arm Wrestling Federation la pynlong da ka Kerala Arm Wrestling Association ha VNK Menom Indoor Stadium Thrissur, Kerala ha ka 28 tarik u Jylliew haduh 2 tarik mynta u bnai.
Ka samla Olivia Dkhar ka la long kum ka lahduh da kaba khur ar tylli ki takma ksiar ha ka jingïa-khun jong ki samla (Youth Level) bad ïoh ruh kawei ka takma rupa bad ban wan ba-ar ha ka jingïakhun Women Senior Level.
Da ka jingsngew sarong halor kane ka jingjop, ka Jaiñtia Arm Wrestling Association (JAWA) ha ka 9 tarik ka la pdiang burom ïa ka ha jingkieng Myntdu surok Jowai-Shillong ryngkat ka jingsynran lang u Kñi Bah Mathus Dkhar, bahaïing bahasem nalor kiwei pat.
Ka samla Olivia haba kren sha ki lad pathai khubor, ka la ïathuh ba ka la sdang nyngkong ïa ka jingïalehkai ïakhun kti ha shnong la jong da ki jingïakop ba pynlong ka Parish bad suki-suki ryngkat ka jingai mynsiem bad pynshlur ki bahaïing bahasem kumjuh ka shnong; ka la ïashim bynta ha ki rynsan ïakhun kti bapher-bapher kiba la pynlong hapoh ka District, ka Jylla, ka ri kumjuh shabar ri.
Ki rynsan bapher-bapher kiba ka samla Olivia ka la ïashim bynta bad wanrah jingjop ki kynthup ïa ka Shillong Arm Fight, 5th Meghalaya Game ha Tura, ka 33rd Annual State Level bad ka la mihkhmat ruh ïa ka ri India ha ka jingïakop ïakhun kti kaba la long ha ri Moldova kaba ha dewbah Europe.
Ki nongïalam ka Jaiñtia Arm Wrestling Association naduh ka General Secretary, Kong Pretty Lyngdoh, u Assis-tant General Secretary Ma Ronchor Shullai ki la pdiang burom ïa ka Olivia Dkhar da kaba pynkup jaiñ ryndia bad ki jingai sngewbha.
