Ka jingïadei shi kur shi jait ka pynsngew jan hynrei kam da dei kaba jan eh haduh katta katta. Namar ka la dei tang kum ka Uniform ne ka kyrteng jong ka jait. Shi kur shi jait makna ngi ïa jngai kumba jngai u bnai bad ki khlur. Ha ka rukom kheiñ kur kheiñ jait te na ngi ki Khasi – pnar ka long tang ka long ka jingïadei kajuh ka jait, kumta ngi shim ba ngi ïa long shi kur shi jait kaba jan.
Hynrei em, ka jingïadei shi kur shi jait ka jngai bha namar ngim ïa dei ne ioh na ujuh u symbai ba ngi ioh lyngba ka shongkha shongman. Kum ka nuksa shu buh ka jingïadei hapdeng ka liang ka Meikha bad ki khun kha te ka long kaba jan haduh katta katta namar ngi ioh na ujuh u symbai wat la ngim ia dei kajuh ka jait ka kynja ruh. Dei kane shi kur shi jait ngi shu ïa sngew paralok kumba ïasngew ieit para khasi khara, bad kum kawei ka jaitbynriew.
Hynrei ban ong ba ka don ka jingïajan te em, namar ka Blood Relationship kam ïadei haei haei ruh wat la ngi ïa ai kajuh ka jait ruh. Shi kur ngi shim ba don jingïadei kajuh ka jait.
Shi jait pat ngi dei na kajuh ka kur. Shi jait makna ngim ïa dei ha ka Blood Relationship namar ngi shu shim ïa ka kyrteng ka jait ym ka jingïadei ha ka doh ka snam. Kane ka long ka jingïadei shi kur shi jait namar ngi ai kajuh ka kyrteng namar ngi shim jait kheiñ jait na ka kmie. Hynrei kam da dei eh ka jingïadei kaba jan wat la ngi ai kajuh ka jait makna.
C. B. Iawphniaw
