Shillong, Naitung 10
Ka Sorkar Jylla ha ka jingïalang jong ka kynhun Myntri kaba la long ha ka Sngi Palei, ka 10 tarik u Naitung 2025, ka la shim ïa ka rai ban pyntreikam ïa ka Meghalaya Film Tourism Policy ha kaba ki nongshna phlim kin ïoh da ka jingïarap pisa ha ka dur ka Subsidy.
Ïa kane la pynbna da u Bah Paul Lyngdoh, Myntri ka Sorkar Jylla ba dei khmih ïa ka tnad Tourism bad u nongaiktien jong ka Sorkar MDA-II.
Ha ka jingïakren bad ki lad pathai khubor, u Bah Paul u la ong ba kane ka policy ka dei kaba la pynkhreh ban ai jingïarap bad ban kyntiew shakhmat ïa ki kam shna phlim hapoh ka Jylla, da kaba ai jingkyrshan da ka subsidy ïa ki nongshna phlim.
U Bah Paul u la pynpaw ruh ba ka sorkar ka la bishar bniah bha bad shim jingmut na palat 200 ngut kiba don bynta ha ka kam shna phlim bad kiwei pat kiba don bynta ha ka Draft Meghalaya Film Policy. Kumta, la shim ïa ki jingai jingmut bad la buh ha ka final policy sha ka jingïalang Myntri ban mynjur.
U Bah Paul u la ong ruh ba kane ka policy ka dei ka sienjam kaba khraw jong ka sorkar ban kyntiew ïa ka Jylla kum ka jaka kaba lah ban tei ïa ka kam shna phlim bad pynmih ïa ki lad aikam aijam ïa ki khun samla jong ka Jylla.
“Lyngba kane ka policy, yn lah ban khring ruh ïa ki nongshna phlim na kylleng ka ri ban wanrah ïa ka kam shna phlim sha Meghalaya, namar ka Jylla ka don bun ki jaka kiba itynnad bad kiba lah ban long ki jaka shna phlim ba paw,” la bynrap u Bah Paul.
