Gaza, Naitung:
Ka Hamas ha ka Sngi Balang ka la mynjur ban pyllait noh ia ki 10 ngut ki briew jong ka Israel kiba ka la rahbor naduh ba sdang jong ka thma. Kane ka long shi bynta na ka jingpyrshang jong ka Hamas ban iatreilang haba iadei bad ka jing-iakren iasuk ba la wanrah da ka US hapdeng ka Hamas bad ka Israel bad ban ialeh ban pynkut noh ia ka jing-iakynad ha ka nongbah Gaza.
Kane ka jingkren jong katei ka kynhun lehnoh Islam ka long hadien saw sngi jong ka jingïakren ba la lam khmat da ka Qatar bad katba ka America pat ka pynpaw ïa ka jingngeit kaba skhem ba kan lah ban wanrah ia ka jingïateh soskular ban sangeh iasiat kumba 60 sngi ha shwa kaba kut jong kane ka taiew.
U nongmihkhmat ba kyrpang jong ka US, u Steve Witkoff, u la ong ba shi bynta jong katei ka jingiateh, kan long ban pynphai biang ia ki 10 ngut ki nongshah rahbor kiba dang im, kiba la bat da ki ehrang Hamas, naduh ki por ka jingleit hiar thma jongka pyrshah ia ka Israel ha ka 7 tarik Risaw, 2023.
Na ki 251 ngut ki nongshah rahbor kiba la shah kem ha ka por ba thombor ïa ki shnong khappud jong ka Israel hajan Gaza, 49 ngut ki dang shah set ha katei ka thaiñ, kynthup ïa ki 27 ngut kiba ki shipai Israel ki ong ba ki la ïap.
Ha ka jingpynbna jong ka, ka Hamas ka la ong ba ki jingeh kiba kongsan ki dang sah ha ka jingiakren, khamtam eh ka jingtuid laitluid jong ki jingiarap sha Gaza, ka jingmih noh jong ki shipai Israel na katei ka jaka bad ki “jingkular ba shisha” na ka bynta ka jingsuk kaba neh.
Hynrei ka la bynrap: “Ka jingïakhih ka la pyni ïa ka jinglong ba jem kaba donkam bad ka la mynjur ban pyllait ïa ki 10 ngut ki koidi (ki nongshah rahbor).
“Watla ka long kaba eh ban ïakren halor kine ki mat haduh mynta namar ka jingbym lah ban pyndem jong ki nongsynshar, ngi dang ïai bteng ban trei shitom bad da ka mynsiem kaba bha bad ki nongpynïasuk ban jop ïa ki jingeh bad ban pynkut noh ïa ka jingjynjar jong ki briew jong ngi bad ban pynthikna ïa ki jingangnud jong ki ban ïoh ïa ka jinglaitluid, ka jingshngaiñ bad ka jingim kaba don burom.”
Ka Israel kham mynshwa ka la paw ba ka la hap shadien jong u Donald Trump President jong ka US bad ka jingkyrmen jong u ban pynkut noh ïa ka jingïakynad, namar ka jingïakren ha Doha ka la bteng sha ka sngi kaba saw ryngkat bad ki jingujor kiba la ïathuh halor ka jinglong jong ka halor ka jingïarap.
U heh shipai jong ka Israel, u Eyal Zamir, u la ong ha ka jingkren ha ka telebishon ba ka jingleh shipai ka la pynkhreh ia ka nongrim na ka bynta ka jingiateh kaba lah ban pynpoi sha la iing ia ki nongshah rahbor jong ka Israel.
U Netanyahu, uba hadien ka jingïakren bad u Trump ha Washington ha ka miet jong ka sngi thohdieng, u dang long uba khlem pyndem ha ka jingkut jingmut jongu ban pynkhyllem ïa ka Hamas, ula ong ba u ngeit ba ka jingïateh kular, ka don ha lynti.
U Myntri ka tnat kam bar ri, u Gideon Saar u la ong ruh ba u pyrkhat ba ka jingiateh ba shipor ka long kaba lah ban ioh bad ka lah wat ban pynbna ia ki jingiakren na ka bynta ka jingsuk kaba kham neh, katba u President Isaac Herzog u la kren shaphang “ka lad kaba don histori” na ka bynta ka jingkylla.
