Shillong, Naitung 11
U Bah Commander Shangpliang, President ka Meghalaya Film Makers Association, u la ai khublei ïa ka Sorkar Meghalaya kaba la mynjur lyngba ka Kynhun Myntri ïa ka Meghalaya Film Tourism Policy 2025 ban ai subsidy ïa kiba pynmih phlim na ka jylla bad nabar ruh.
Kane ka jingai khublei u Bah Commander ïa ka sorkar jylla namar ka Kynhun Myntri hapoh ka jingïalam u Conrad K Sangma kum Myntri Rangbah ka Jylla ha ka 10 tarik u Naitung 2025 ka la mynjur ïa ka Meghalaya Film Tourism Policy.
Ha kane ka policy, ka sorkar kan ai subsidy haduh T.1 klur lada ki nongpynmih phlim na rithor ki wan ringdur ïa ka phlim jong ki haduh 75 percent ha Meghalaya.
Katba ïa ki nongpynmih phlim na ka jylla ha ktien Khasi, Pnar bad Garo kan ai subsidy haduh T.50 lak uwei na bynta ar snem.
U Bah Commander u la ong ba lyngba ka jingpynmih ka sorkar jylla lyngba ka Tnat Jngohkai Pyrthei ïa ka Hello Meghalaya ka la ïarap ïa ki trai kiba ju pynmih phlim Khasi namar ïa ki phlim rim bad phlim thymmai ka la kyrshan da kaba siew da ka pisa.
U la ong ba lada la pynmih ïa kane ka ‘film policy’ ka sorkar kam dei ban pynduh ïa ka jingai jingïarap pisa ïa ki phlim Khasi namar ka long shisha ka lad ban aikam ïa ki samla.
U la ong ruh ba nalor ki phlim, ka sorkar ka pynshlur ruh ïa ki nongrwai, kiba donsap ban thep ha Hello Meghalaya.
Ha kajuh ka por u la kyrpad ïa ka sorkar ba kan pynurlong ban shna ïa ki cinema khnang ba ki phlim ba la pynmih yn pyni ruh ha ki cinema khnang ba ki paidbah na nongkyndong lada kim lah ban poi sha Shillong kin ïoh peit pat tang ha ki district headquarter.
U Bah Commander u la pynkynmaw ba ka seng ka ju buh ïa ki dorkhas man ka por sha ka Sorkar Jylla ban kyntiew ïa ki kam shna phlim bad mynta ka la urlong shisha ha kane ka sorkar ba la ïalam da u Conrad K Sangma kum Myntri Rangbah ka Jylla.
