Shillong, Naitung 11
Ka Meghalaya ka dei ka jylla kaba don ïa ka jinglah ban shalan ïa ki mar rep shabar ka jylla bad kumjuh shabar ka Ri. Halor kane na ka liang ka Myntri Tnat Pla Tyngka ka Sorkar Pdeng, ka Nirmala Sitharaman, ha ka Sngi Thohdieng ka la kaweh lama kum ka dak ka jingphah ïa ka kali kaba kit 2 metric ton ki sohtrun sha ka jaka die kaba la tip kum ka LULU Retail kaba don ha Dubai.
Kane ka jingshalan shabar ri ïa ki sohtrun ka dei kaba la ïoh na ki nongrep jong ka Jirang Organics Farmer Producer Company ha Ri-Bhoi district, ka pyni ïa ka jingkiew jong ka jylla ha ka jingdon-jingem jong ka rep ka riang ha ka pyrthei hapoh ka jingthmu jong ka Megha-LAMP kaba la kyrshan da ka IFAD.
Ha kane ka sngi, ka la don ruh ka jingsam ïa ki song pisa sha ki nongïoh jingmyntoi hapoh ki skhim PM MUDRA, PM SVANidhi, PMEGP, bad NPS Vatsalya.
Ka jingshalan ïa u sohtrun uba khlem khleh dawai ka pyni ïa ka jinglah jong ka jylla ban long ka jylla ba kongsan ha ki ïew rep ha ka pyrthei, tang da kaba pyndonkam ïa ka jinglong ka suiñbneng kaba bha bad ka jingroi jong ka jingtbit ha ki rukom rep da ka sboh mariang.
Ka Myntri Tnat Pla Tyngka, ka Sitharaman ka la pyllait ruh ïa ka kaiphod PRIME Impact Report kaba la tip kum, “Ka Meghalaya ha ka jingïaid lynti: Ki jingjop ha ki 7 snem,” ne ka “Meghalaya on the Move: Achievements Over 7 Years,” kaba thoh ïa ka jingkiew jong ka jylla ha ka jingsynshar, ka jingpynmih jingmut thymmai, bad ka jingtrei kam ha ki bynta bapher-bapher.
