Shillong, Naitung 13
Ka Iga Swiatek ka la lah ban pynsah kynmaw ïa lade ha ka sngi Saitjaiñ da kaba ka la rah ïa ka nam lahduh kaba nyngkong ha ka Wimbledon bad kane ka long jingjop kaba hynriew jong ka ha ki jingïalehkai para marwei jong ka Grand Slam.
Ka la long ruh ka kynthei kaba nyngkong naduh ka Steffi Graf ha ka French Open ha u snem 1988, ban jop ïa ka final ha ka jingïakhun para marwei da kaba ka la pynliem noh da 6-0, 6-0 ïa ka Amanda Anisimova jong ka U.S. ha ki 57 minit.
Kumba ka paw ka Swiatek ruh ka la jop ïa ka nam lahduh khlem da ïakynduh wat tang kawei ruh ka nongïalehkai ba hakhmat eh ha ka thup ba shiphew, kumba la kdew ha ki rynsan social media.
Ka Anisimova, ka nongïalehkai kaba bat ïa ka kyrdan ba khadar ha ka pyrthei, ha kaba ka la ïakynduh final pyrshah ïa ka Swiatek.
Ka kynthei ba khatduh ban jop ïa ka lympung ïalehkai kaba heh khlem da ïakynduh ïa ki nongïalehkai ba bat ïa ka kyrdan ba hakhlieh duh ka dei ka Emma Raducanu ha ka U.S. Open 2021. Kane ka nongïalehkai ba kynsai ka la ïakynduh ïa ka nongïalehkai kaba don ha ka kyrdan ba khadwei ka Belinda Bencic.
Ka Swiatek kaba la rah sha ïing ïa ka song pisa kaba $4.1 million (?351,910,613.70), ka la dei ban ïakhun pyrshah ïa ka Aryna Sabalenka kaba bat ïa ka kyrdan ba nyngkong ha ka pyrthei ha ka phainal, hynrei ka Anisimova ka la ïoh jaka sha ka phainal da kaba pynliem noh ïa ka Sabalenka ha ki lai tylli ki set kiba eh bha ha ka semi final. Kane ka jinglah ban ïalehkai bha ka la pynlong ka jingangnid ï aka ban dangïalehkai bha sa ha ka final.
Ka Anisimova ka dei hok ban ïoh burom namar ba ka la ïoh rung sha ka phainal jong ka Wimbledon hadien ki khyndiat tylli ki snem ba jynjar ha kaba ka la duh noh ïa u kpa jong ka, ka la ïakhun pyrshah ïa u khñiang jingpang Covid bad ki jingmynsaw bapher bapher bad nangta ka la shongthait shipor tat haduh ba kan dangïoh ïa ka jingkoit jingkhiah ha u snem 2023. Shi snem hashwa, ka la shah shah rem ha ka jingïakhun jong ka Wimbledon.
“Ka lah ban pyni ba ka long kaba lah. Nga pyrkhat ba kata ka dei shisha ka khubor kaba kyrpang kaba nga la lah ban pyni”, la ong ka Anisimova ha ki nongthoh khubor. “Haba nga la shongthait, bun ki briew ki la ong ïa nga ‘Phin ym lah shuh ban poi sha ka kyrdan ba hakhmat eh lada phi shim por haduh katne na ka jingïalehkai.’ Kata ka la long kaba eh khyndiat ban sngewthuh. Namar nga kwah ban wanphai biang bad dang lah ban jop shibun bad jop ïa ka Grand Slam ha kawei ka sngi. Tang ma nga kaba lah ban pynshisha ba phi lah ban ïoh biang ïa ka kyrdan ba hakhmat eh jong phi.”
