Shillong, Naitung 14
Ka Khasi Students’ Union (KSU), Bengaluru Unit, ka la pynpaw ïa ki jingeh kiba ïai bteng ba ki samla pule bad ki nongtrei na Meghalaya kiba shong ba sah ha Karnataka ki ïakynduh.
Ka seng ka la kyntu ruh ïa ka Sorkar Meghalaya ban pynsted ha ka ban thaw ïa ka Meghalaya House ha Bengaluru ban weng ïa kine ki jingeh.
U President ka KSU Bengaluru Unit, samla Donboklang Nongphud haba kren sha ki lad pathai khubor u la pynpaw ka jingsngewkhia halor kane ka jingsahteng kaba la slem bah.
“Ki dang don ha ka jingpynkhreh ban thaw ïa ka ïing jong ka Jylla ha Karnataka. Ki (Sorkar Meghalaya) la ong ba kin sa pyntip sha ngi, hynrei haduh mynta kam pat don kano-kano ka jingpyntip,” u la ong.
Katkum ki khubor ba ka mih, ka Sorkar Jylla ka la rai ban thied ïa kawei ka ïingmala kaba shongdor T.20 klur ha Bengaluru ban shakri kum ka Meghalaya Guest House na bynta ki samla pule bad ki nongwan jngohkai na ka Jylla.
U Myntri Sorkar, uba dei ruh u nongaiktien ka Sorkar, Bah Paul Lyngdoh, hadien ka jingïalang ka Kynhun Myntri ha ka 26 tarik u Lber, 2025, u la pyntip ba katei ka ïingmala kan don ar tylli ki kamra thiah baheh (Dormitory), kaba lah ban pdiang ïa 50 ngut ki khynnah shynrang bad 50 ngut ki khynnah kynthei.
Wat hapdeng kane, u samla Nongphud u la pynpaw ba kam shym la don kano-kano ka jingïakren kaba shai haba ïadei bad ka jingthied ïa kano-kano ka ïingmala.
Sa kawei pat ka kot khubor ka la kdew ba ka Sorkar Meghalaya ka la sdang ban pynithuh ïa ka jaka na bynta ka Ïing jong ka Jylla ha Bengaluru naduh u bnai Rymphang, 2024, ha kaba ka tnad GAD ka la pynmih ïa ka Expression of Interest (EOI) ban thied jaka ha Bengaluru Urban District. Hynrei ym shym la ïohi ïa ka kam kaba tikna wat hadien shisnem mynta.
Haba kylli kumno ka seng kan leh nangne shakhmat lada ka jingpynslem ka ïai bteng, u samla Nongphud u la ong ba ki dang ap ïa ki jingpyntip na u General Secretary.
“Lada ngim ïoh kano-kano ka jingpyntip, ngan sa ïakynduh biang hi dalade ïa u Myntri ryngkat bad ka KSU-CEC. Kane kan dei ka jingleit kynduh kaba lai jong nga ha kaba ïadei bad kane ka kam,” u la bynrap.
Haba kren halor ka jingdawa, u samla Nongphud u la kdew ba u President barim ka KSU Bengaluru Unit, samla Ramphang Nongsiej bad General Secretary, samla Amous Syiemlieh ki la leit ban ïakynduh ïa u heh ka BJP ha kata ka por, Bah Shibun Lyngdoh ha u snem 2017, da kaba kyntu ïa u ba un rah ïa kane ka kam sha ka Sorkar Congress ha katei ka por.
“Ka Sorkar Congress ka la kular ban shna ïa ka ïing, hynrei khlem shym la jia eiei, nangta wan sa u COVID,” u la ong.
U la bynrap ba ha u snem 2022, u la ïakynduh ïa ki heh ka GAD kiba la ïasam ïa ka shithi kaba la thoh sha ka Sorkar Karnataka, kaba pyni ïa ka jingangnud ban thaw ïa ka Meghalaya House ha ka Jylla. Hynrei ki dang ap ïa ka jubab na ka Karnataka.
“Ngi dei ban don ïa ka Meghalaya House kaba paka ha Bengaluru. Mynta, ngi ki samla pule bad ki ‘volunteer’ ngi ïarap ïa ki briew na ka Jylla jong ngi. Lada don ka Meghalaya House kaba tikna, ki ophisar ka Jylla kin kham lah ban pynbeit ïa ki jingeh ba ki briew jong ngi ki ïakynduh ha Karnataka” u la ong.
Ha kajuh ka por, u samla Ïohborlang uba dei u Civil Engineer uba sah ha Bengaluru u la pynsawa ïa katei ka jingdawa.
“Bun ki samla pule na ka Jylla jong ngi ki sah hangne. Ka Meghalaya House kan pyntikna ïa ki kmie ki kpa jong ngi ba ka jingïarap ka don hajan lada jia ba don ki jingjia ba kyrkieh,” u la ong.
Na ka liang Joystar Lyngkhoi ba trei ha katei ka jaka, la bynrap, “Ki briew ki wan shane na bynta ka jingpule bad ki kam ki jam. Ka Meghalaya House kan ai ka jaka sah kaba biang dor bad ka jingkyrshan kaba kongsan.”
“Bunsien ki briew ki mad jingeh ha ka leit ka wan bad ka wad jaka. Nga kyntu ïa ka Sorkar ban pynsted ïa kane ka kam,” la ong.
Ha kawei ka liang haba ki lad pathai khubor ki la leit sha ka tnad GAD ka Jylla, uwei u heh Sorkar u la pynpaw ba katei ka projek ka dang ïaid shakhmat bad la khmih lynti ban pyndep ha kaba kut jong une u snem.
Hynrei haba kylli, hato ka Sorkar kan shim ne em ïa ka ïingmala kaba la don lypa ne shna ïa ka bathymmai, utei u nongtrei u la jubab, “Ngam don jingtip eiei.”
