Shillong, Naitung 14
U Bah Jitendra Dkhar, Founder Member bad CEO ka Blind Lead Trust, u la ïathuh ba ki don kiwei pat ki kynhun jong kiba duna ha ki dkhot met kiba pyndonkam bakla, da kaba leit ban pan pisa na ki paidbah ha ka kyrteng ka seng.
U Bah Jitendra u la pynshai sha ki paidbah ha ka Lah Sngi U Blei ka 14 tarik u Naitung 2025, da kaba ong ba ba lada ki paidbah ki lap ïa kum kine ki dei ban pan ïa ki receipt, ki ID bad ki project kiba ki leh ba ki lah ban pynshisha.
Ha ka jingïakren bad ki lad pathai khubor, u Bah Jitendra Dkhar, u la ïathuh ruh ba ka kynhun jong ka seng jong u ka shait leit pan jingïarap ne donation, hynrei ki leh pat da ka por katkum ka jingaibor ki bor district, da kaba buh ruh da ki receipt, ki ID ïa kito kiba ka seng ka phah.
“Ngi shait pan ka jingbit (permission) na ka district administration bad kata ka jingbit ka don da ka por, bad kum ka seng ngi ju leh ha kata ka rukom, ha kajuh ka por ngi ju pyni ruh ïa ki receipt, ki ID jong ka seng. Kumta ki paidbah lada lap ba don kiba wan lum pisa ha ka kyrteng ka seng kin pan beit ïa ka receipt ban pynshisha,” la ong u Bah Jitendra.
Nalor kane u la ong ruh, ba kine kiba pyndonkam bakla ha ka kyrteng ka seng ban leit lum pisa na ki paidbah ki dei ban sangeh noh shisyndon lym kumta kin sa pyrkhat da kumwei ban pynshitom ïa ki.
Shuh-shuh, u Bah Jitendra u la ong ba don kiba duna dkhot met kiba leit khrong pisa bad hadien ba ki la ïoh ki leit ban thied ïa ki jingdih kiba sniew. Kumta u la kyntu ïa ki paidbah ba kin long kiba husiar ïoh ba ki don kiba kum kine. U la kyntu ruh ïa ki para ba don jingduna ha ki dkhot met ba kin ym pynmlien ban ngop ha kine ki jingsniew. Nangta u la kyntu ruh da kaba ong ba kim dei ban shim ïa ka kam khrong pisa kum ka lad kamai jong ki, hynrei ki dei ban leh ruh da kiwei ki kam da kaba ïakhun ruh ïa ki eksam bapher-bapher kum ka MPSC ne ban leit ha ki coaching centre bad ki jaka pule bapher-bapher khnang ba kin ïoh jinghikai bad ba kin ïohkam ïohjam hadien habud.
Kum ban shu kdew hangne, kane ka seng hapoh ka jingïalam u Bah Jitendra ka dei ka seng kaba peit ïa ki briew kiba don jingduna ha ki dkhot met bad kaba la dep ban pynrung kyrteng ruh ha u snem 2018, bad ka seng ka la trei la ka bor ban pynbha ïa ka kam.
