Shillong, Naitung 14
Kum shi bynta ban kyntiew ïa ki khynnah ïalehkai na Ri-lum Garo, hynñiew ngut ki nongking-lieng ki la shah jied ban ïoh ka jingshah hikai ha ki coach kiba kynsai ka pyrthei bad kane ka long kum shi bynta ban pynkhreh ïa ka 39th National Games 2027.
Kane ka prokram ai jinghikai kan sdang naduh ka 18 tarik mynta u bnai ha ka shnong Umtham, Ri Bhoi district.
Ïa kine ki samla la jied hadien ka Kayaking Sum-mer Camp kaba lai sngi ba la pynlong da ka Megha-laya Canoe Association (MCA) ha kajuh ka jaka naduh ka 10 haduh 12 tarik mynta u bnai.
Kane ka prokram ïalehkai ka long ban ithuh ïa ki samla ïalehkai kiba don jingkyrmen na kylleng ka jylla khnang ba kin ïoh ka jingshah hikai kaba paka ha ka jingïa-lehkai king-lieng, kaba long shi bynta jong ka jingpynkhreh ïa ka National Games ka ban sa long ha ki ar snem ban wan.
Kum ban pynpaw ha katei ka prokram la wan sakhi da ka jingshim bynta shitrhem jong ki khynnah ki samla kiba na Tura, ba la pynlong da ka Tura Adventure Club (TAC) da kaba ka la jied hynñiew ngut ki samla katei ka thaiñ khnang ba kin ïoh ban ïasoh lem bad kiwei pat ki nongking-lieng kylleng ka Jylla.
Katkum ka kyrwoh ba la pyllait da katei ka klob, baroh ki nongïalehkai na Tura ki la pyni ïa ka jinglong ba itynnad, ka jingkmen, bad ka jinglah ban pynïadei dur, da kaba pdiang kloi ïa ka jinghikai kaba eh wat la ki don tang khyndiat ka jingduna jong ki.
Ka jingpynrung ïa ki ha ka prokram ai jinghikai ïa ki nongïalehkai ka pyni ïa ka jingsarong na ka bynta ki jingangnud jong ka Garo Hills ha ka jingïalehkai, la pynpaw ka TAC bad kaba la pynpaw ruh ïa ka jingsngewnguh kaba khraw ïa ka Meghalaya Canoe Association bad baroh ki kmie ki kpa bad ki dkhot jong ka imlang-sahlang kiba ka jingkyrshan jong ki na ka bynta ban kyntiew ïa ki khynnah ïalehkai na Garo Hills ha ka jingïalehkai king-lieng bad ba kin nangkiew shaphrang ha ki lympung ïakop hapoh ka ri.
