Shillong, Naitung 14
U Sanjay Kumar, IAS, Secretary ka tnat Pule-Puthi jong ka Sorkar India ha ryngkat bad u Prof. Dinesh Prasad Saklani, Director, NCERT ki la leit ban jngoh ïa ka North East Regional Institute of Education (NERIE), Shillong.
La sdang ïa kane ka prokram da ka jingkren pdiang sngewbha na ka Prof. Flourette G. Dkhar, kaba dei ka Incharge Principal ka NERIE.
Ha ka jingkren jong u Kongsan, u Sanjay Kumar, IAS, u la ban jur ba ka thong ba hakhmat eh jong ka tnat ka long ban peit ba ym don iwei ruh khynnah iba duhnoh ïa ka lad ban leit skul. U la ban jur ba tang ka jingwan skul kam pat biang hynrei ban pynthikna ïa ki jingmih na ka jingpule ba kongsan ka long kaba kongsan.
U la pynpaw ruh ïa ka jingdonkam jong ka jingpule ha kaba pynwan dur ïa ki khynnah skul sha ki nongpyrkhat kiba jylliew kiba noh synñiang kaba don jingmut sha ka imlang-sahlang.
U Sanjay Kumar u la ïaroh ïa ka jingtrei shitom jong ka NERIE ha ka jingai jinghikai ïa ki nonghikai bad kyntu ïa kane ka jaka pule ban kyntiew ïa ka B.Ed. bad sdang ïa ka prokram ai jinghikai ïa ki Nonghikai ba la pynïasoh lang sha ka Four-Year Integrated Teacher Education Programme (ITEP).
U la pynpaw ka jingkyrshan ban seng ïa ka skul ba pyndonkam bun jait ne ka Demonstration Multipurpose School (DMS) ha NERIE, kumba don ha kiwei pat ki jaka pule jong ki thaiñ. U la ban jur ruh ban pynrung ïa ka jinghikai kam naduh ka klas 6 shaneng bad ka jingdonkam ban pynkhlaiñ ïa ka jingïadei jong ka NERIE bad ki sorkar jylla jong ka thaiñ shatei lam-mihngi.
Kaba kongsan ka long ba u Sanjay Kumar u la kyrpad ïa ka Sorkar Meghalaya ban ai jaka na ka bynta ban pynheh ïa ki jingtei jong ka NERIE. U la pynpaw ba khnang ban pynurlong ïa ki jingthmu jong ka NEP 2020, ka long kaba donkam ban pynbha ïa ka jinglah jong ka tnat treikam na ka bynta ban pynkhreh ïa ki nonghikai ba la pyntbit ha ka kam ha ka thaiñ kiba kham bun.
U Swapnil Tambe, IAS, Secretary ka tnat Pule-Puthi jong ka Sorkar Jylla, u la ai khublei ïa ki jingnoh synñiang jong ka NERIE ha kaba kyntiew ïa ka sap jong ki nonghikai bad pynroi ïa ki jingtei. U la ïasam ruh ïa ki jingthmu ba la tyrwa da ka Sorkar Jylla, kynthup ïa ka jingpynbeit ryntih ïa ki skul ban kyntiew ïa ka pule puthi.
U Prof. Dinesh Prasad Saklani u la pynpaw ïa ki jingjop jong ka NCERT ha ka pule-puthi ha ki skul bad u la kdew ruh ïa ka jingthmu ban kyntiew ïa ka kyrdan pule nonghikai ha kane ka thaiñ lyngba ka NERIE. U la kren shuh shuh shaphang ka jingdonkam kyrkieh ban pynïar ïa ki jingdonkam ha ka NERIE khnang ba kane ka jaka pule kan lah ban pynbiang pura ïa ki jingdawa pule puthi kiba nang kiew jong ka thaiñ.
U la pynpaw ïa ka jingangnud kaba khraw ban ïohi ïa ka NERIE ba kan biang ki jaka bad ki jingdonkam khnang ba kan lah ban treikam ha kajuh ka kyrdan bad kiwei pat ki Regional Institute of Education.
La pynkut ïa ka prokram ba pura da ka jingai khublei na u Prof. Subhas Chandra Roy Dean (Instruction), NERIE. Hadien kane, ki ‘riew rangbah ki la plie paidbah ïa ka Kanaklata Girls’ Hostel kaba la shna thymmai bad ka NERIE Guest House.
