Jowai, Naitung 24
U MDC jong ka VPP na War Central Constituency, Bah Jamshaphrang Pohtam u la pynpaw ïa ka jingsngewkhia halor ka jingbym lah jong ka Executive Committee (EC) jong ka JHADC ban kynthup ïa ki lai tylli ki ïew ha nongbah Jowai hapoh ka jingkhmih jong ka Council haduh mynta mynne.
U Bah Pohtam u la pynpaw ïa la ka jingsngewkhia haba wanrah ïa ka motion ban ïatai halor ki jingdonkam ban khmih biang bad pynbha ïa ki ïew jong ka Council (kynthup lang ïa ki ïew shimet bad ki ïew ba dei trai da ka Council) ha ka Dorbar Lyiur jong ka JHADC kaba la long ha ka 24 tarik Naitung.
Haba ïatai ïa ka motion jong u, u Bah Pohtam u la pynpaw ïa ka jingsngewdiaw halor ka jinglong jingman jong ka ïew ha Muktapur kaba don 4 ne 5 tylli ki ïing trep bad kawei ïing maw ba la shna naduh ka por jinglong MLA u Bah RL Tariang namar katei ka ïew ka la kylla ïing jah bad u la bynñiaw ruh halor ka jingkhang noh jong ka ïew ha ka shnong Jarain kaba la neh mynta da bun tylli ki snem.
Ha kawei pat ka liang, u MDC jong ka War Central u la pynpaw ruh ïa ka jingdonkam ban plie noh ïa ki ïew ba thymmai ha ki thaiñ nongkyndong khnang ban kyntiew ïa ka ïoh ka kot jong ki thaiñ nongkyndong. U la dawa ïa ka Executive Committee ban plie noh ïa ka ïew ba thymmai ha shnong Amlarem hapoh Amlarem Civil Sub Division khnang ban kyntiew ïa ka ïoh ka kot jong ka thaiñ.
U Bah Pohtam u la pynpaw ïa ka jingsngewkhia halor ka jinglong jingman jong ki ïew ba la pynïaid da ka Council namar ka jingbym biang ki dukan, ki lynti-syngkieñ, ki paiñkhana, ka um bad kumta ter ter.
Ki MDC kiba la kyrshan ïa ka motion ba la wanrah da u Bah Pohtam ki kynthup ïa ka Kong D Tongper, Bah G Susngi bad u Bah AA Shullai, kiba dei ki MDC jong ka VPP.
Haba jubab ïa katei ka motion, u Executive Member Bah Seiborlang Shadap u la ong ka Executive Committee dang shen ka la ïoh ai jingïarap 50,000 tyngka ïa ki nongpynïaid jong ka Ïew Khanduli khnang ban pynbha pynmiat ïa katei ka ïew kaba don ha ki thaiñ khappud jong ka jylla.
U la ong ba ka Executive Committee ka la dep phah ïa ka jingthoh sha ka Sorkar Jylla ban ai skhim ba kyrpang na bynta ban kyntiew ïa ka ïew kaba ha Wahïajer, West Jaiñtia Hills District kaba ju long ïew ar sien shi taïew kata ïew Pynsin bad ïew Pyngkat. U la ong ruh ba ka tnat jong u ka la dep thoh sha ki nongpynïaid jong ki ïew ha 8 Mer, Sahsniang bad Pynsin, Rymbai ba ki dei ban wan pynithuh ïalade sha ka Council.
U Executive Member u la ïathuh ba ki ïew kiba don ha Jarain bad Muktapur ki la khang noh ne ym treikam shuh namar ka jingïakynad hapdeng ki shnong kiba don marjan bad kitei ki ïew hynrei ka tnat kan ïai pyrshang ban pynbeit ïa kitei ki jingkynad.
U la ïathuh ba ka tnat ka la pynkiew ïa ka bai wai jong ki dukan hapoh Iewthymme na ka 700 tyngka shi bnai sha ka 1300 tyngka shi bnai hynrei ki la don ka jingpyrshah na katto katne ki nongshong ïew halor katei ka jingpynkiew dor ïa ka bai wai.
U Deputy Chairman jong ka JHADC, Bah Wailad Dameshwa Siangshai u la kylli ïa u Bah Pohtam, hato u la hun ïa ka jubab bad hato un weng noh ne em ïa katei ka motion?
Na ka liang u Bah Pohtam u la weng noh ïa ka motion hadien ba u la ïoh ïa ka jingkular na u Executive Member ban wad ki lad ki lynti ban plie ïa ka ïew ha Amlarem.
