Shillong, Naitung 24
Hadien ba la mih ka jingkynnoh na ka seng ki nongñiah trok ba la tip kum ka Meghalaya Commercial Truck Owners and Drivers Association (MCTODA) ba ki don haduh 16 tylli ki khyrdop lum khajna ka Khasi Hills Autonomous District Council (KHADC) ha Ri Bhoi, na ka liang u Executive Member (EM) ka KHADC, Bah Powell Sohkhlet u la ong ba katkum ka dulir jong ka KHADC ha Ri Bhoi, ki khyrdop lum khajna ki don tang 3 tylli.
“Ka long kaba bakla ba ki seng nongñiah trok kin shu kynnoh ba ka District Council kan don 16 tylli ki khyrdop. Ngim tip ba kita ki 16 tylli ki khyrdop ki dei jongno hynrei na ka liang jong ngi ki don tang 3 tylli ki khyrdop,” ong u Bah Powell.
Ha ka jingïakren bad ki lad pathai khubor ha ka Sngi Palei, u Bah Powell u la ong ba ki don na ki khyrdop khrong khajna kiba la don lypa naduh ka EC barim bad kim dei kiba beaiñ.
U la ong ba na ka liang ka KHADC kam shym don ïa ki khyrdop khrong khajna beaiñ bad lada lap ba ki don ki khyrdop beaiñ da kaba ai ha ka kyrteng ka KHADC, kino-kino kiba lap ki dei ban wan ujor bad kdew ba ki don ha kano ka jaka khnang ba ka District Council kan leh ïa kaba donkam.
“Lada ki ong ba ki don 16 tylli ki khyrdop jong ka District Council, ka dei ban wanrah da ka jingthoh shane ban kdew ba kita ki 16 tylli ki khyrdop ki don hangno lane ha kano ka jaka ne ka shnong kaba ki don bad ki khrong ïa kaei. Lada ki leh kumta, ngi ruh ngin sa shim da ki sienjam kiba biang ban ujor sha ki bor pynïaid distrik bad sha ki bor ba dei peit hynrei lada ki shu kynnoh kumto khlem ki jingpynshisha ba ki dei ki khyrdop jong ka KHADC, ka long kaba shitom ïa ngi ban shim ïa kano-kano ka rai,” bynrap u Bah Powell.
