Jowai, Naitung 24
Ki MDC ka Voice of the People Party (VPP) ki la khluit tar hadien ba kim ïohlad ban rah ïa ki jingkylli ba ki la buh ha ka kynta kylli jingkylli hapoh ka dorbar lyiur ba shisngi jong ka Jaiñtia Hills Autonomous District Council (JHADC) kaba long ha ka 24 tarik u Naitung.
Kane ka jingkhluit jong ki MDC ka liang pyrshah ka la sdang naduh shwa ban sdang ka dorbar hadien ba bun tylli ki jingkylli bad ar tylli ki mat ïatai ki la shah kyntait ha kane ka dorbar bad bynrap ruh sa kiba bun ki dkhot ka VPP ki la duh ïa ka lad ban kylli halor ki mat ba ki la wanrah bad la sam hapoh ka ïingdorbar.
Hadien ba la kut ka dorbar, ki MDC ka VPP bad Congress hapoh ka jingïalam u nongïalam liang pyrshah u Bah Andrew Awhai Shullai bad MDC Congress u Bah Rikut N Parien ki la tur sha ka kamra treikam u Deputy Chairman Bah Wailad Dameshwa Siangshai ban kyntu ba um dei ban kyntait ïa ki jingkylli bad ki mat ïakren ha ki dorbar ban sa wan.
Na ka liang u Deputy Chairman u la ong ba ha ka jngshisha jia ryngkhat ba u pynïaid ïa ka dorbar namar ba ki don ki kam ba kyrkieh u Chairman bad um don jingtip ïa kiei ki mat ba ki la rah bad kiba shah kyntait.
Ha kaba ïadei bad ka kynta kylli jingkylli u la ong ba u la pynïaid ïa ka dorbar katkum ka por kaba la buh shi kynta. Halor kane u la ong ba un shimkhia ban ïakren ban pynïaid beit ïa ka dorbar.
Na ka liang ka liang pyrshah ki la pynpaw ïa ka jingbym hun bad ban jur ba baroh ki dkhot kiba buh jngkylli ki dei ban ïohlad ban kylli ban rah ïa ki mat ïakren ban tei ïa ka council hapoh dorbar.
