Shillong, Naitung 24
Ka Federation of Khasi Jaiñtia and Garo People (FKJGP) Sengkmie ka buh ka jingkyrpad ha u Chief Executive Member (CEM) bad na ka Executive Committee jong ka KHADC ba kan pyrkhing halor ka jingai laisen khaïi (Trading License) sha kino-kino ki ‘riewshimet bad kumjuh sha ki Non-Tribal Agencies/Firms kiba thmu ban leh ïa kino-kino ki kam khaïi-pateng ha u pud u sam jong ka Khasi Hills Autonomous District Council.
Ha ka dorkhas ba la aiti sha u CEM Bah Shemborlang Rynjah, ka FKJGP ka la ong, kum ban shu pyntip ba dang ha ki khyndiat bnai ba la dep na ka liang jong ka seng ka la dep ban khang bad pyrshah jur ïa ki katto-katne tylli ‘tender’ ba la pyllait da ka National Institute of Fashion Technology (NIFT), Shillong ha kaba ïadei bad ka jingkhot aplikeshon na ka bynta ki kam Security (security personnel) lyngba ki Agencies/Firms bapher bapher. Ka jingpyrshah jong ka seng ka long ba hadien ba la pule bad bishar bniah ïa ki kyndon (criteria in the Bid Evaluation Sheet) ba la buh da ka NIFT la lap bad shem ba ki long pynban kum ka jingplie lynti na ka bynta jong ki kynhun (Agencies/Firms) kiba na shabar.
Ka FKJGP ka la long ba ha kane ka kynti kaba mynta ruh ka la ïoh ïa ka jingujor ba na ka liang jong ka National Institute of Technology (NIT), Meghalaya ruh ki la pyrshang ban bud ïa kitei kijuh ki sienjam kumba la leh da ka National Institute of Fashion Technology (NIFT), Shillong kum ka jingplie lad plie lynti na ka bynta jong ki kynhun Non-Tribal Agencies/Firms.
Kumta, na ka liang jong ka Federation of Khasi Jaiñtia and Garo People (FKJGP) Sengkmie, ka kyrpad ïa u CEM ka KHADC ban shimkhia ban teh lakam ïa ka jingai Trading License sha kum kitei ki jait kynhun (Agencies/Firms) kiba na shabar kiba pyrshang ban knieh noh ïa ka kam kamai jakpoh jong ki trai ri – trai muluk lyngba jong kitei ki kam khaïi-pateng ha kaba kum ka jaidbynriew, ka la don shibun ki kynhun kiba la lah ban trei ïa kum kitei ki jait kam ban bat hi ïa u lakam jong ka khaïi-pateng.
