London, Naitung:
Katkum ki khubor, la ong ba kawei ka briew bad 2 ngut ki khynnah ki la khlad na ka jingiasiat naphang ha kawei na ki thaiñ jong ka Northern Ireland ha ka Sngi Balang. Nalor kine kiba khlad, uwei pat u rangbah u la mynsaw jur na ka jingshah ksam kuli ha katei ka jingjia. Ki pulit ki iathuh ba kitei 4 ngut ki dei na kajuh ka longïing.
Ia mynta hi, ki pulit kim pat lah ban pynshai ne iathuh ia ka daw jong katei ka jingjia, hynrei uwei u nongialam jong katei ka thaiñ, u la ong ba katei ka jingjia ka lah ban dei ka jingiakajia shi iing- shi sem.
Ki pulit ka thaiñ ki la pynpaw ba ia mynta hi, ym shym la iohi ba kan don kano-kano ka jingma ia ki paidbah ne ia ki nongshong shnong jong katei ka jaka bad ka thaiñ hi baroh kawei.
Kane ka la jia shabar jong ka shnong Maguiresbridge, kumba 75 Mer lane kumba 120 Kilometre na ka phang Shathie-mihngi jong ka Belfast.
Shuh shuh, ki pulit ki la iathuh ruh ba ki la ioh jingtip halor katei ka jingjia dei ha ka por kumba 8 baje jong ka step Sngi Balang, ha kaba ki la leit bran-bran sha katei ka iing bad la shem ba 2 ngut kitei kiba shah siat, ki la dep khlad lypa shwa ban wan poi ki pulit.
