Washington, Naitung:
Kawei ka samla long-kmie kaba dang 18 snem ka rta na Florida ka la shah kem hadien ba ka la set-kut ia la ka khun hapoh ka kali kaba lhop tang ban ioh peit ia ka phlim ‘Smurfs’ ryngkat bad ki para.
Kane ka jingjia ka la paw pyrthei hadien ba ka Regal Cinema 90, kaba don ha US Highway 90, ka la pyntip sha ki bor pyniaid ha ka por kumba 5:49 baje mynstep, shaphang uwei u khyllung uba la don hapdeng ka jingshitom kaba jur, uba la shah set-kut hapoh katei ka kali kaba la wan poi sha katei ka jaka.
Ki heh pulit, ynda ki la leit poi sha katei ka jaka, ki la lap ia utei u khynnah uba la saw kyrang, u la shu ïam khlem sangeh bad uba la jhieh lut baroh shirynïeng namar ka jingjur ka shit bad lhop hapoh ka kali kaba u la shah set-kut. Ki pulit ki iathuh ba ka jingshit jong ka suiñ bneng shabar ruh ka la poi lypa 34.4 Degree Celsius ryngkat ka jingshit kaba 41.7 degree Celsius bad kumta ka jingshit hapoh ka kali ba la khang khyrdep lei ka long kaba jur haduh katta.
Ki pulit ki la pynkit noh mar- mar ïa utei u khyllung sha ka Lake City Medical Centre ban pynïoh ia ki jingsumar ba kyrkieh bad ban pyllait ia u na ki jingma.
Katei ka nongshah kynnoh, ka Tripura Merriex, ka iathuh ha katei ki pulit, ba ha kaba sdang, ka la ialam lang ia ka khun jongka shapoh katei ka jaka peit phlim, hynrei katei ka khyllung kam neh ban shong bad ka iam lynñiar hapoh ka kamra peit phlim bad kumta kane ka la pynthut ia kiwei pat kiba leit khnang sha katei ka jaka ban pynbyrngia ialade. Dei kane ka daw, kaba la pynlong ia ka ba kan ialam biang ia katei ka khyllung sha ka kali bad ban set-kut ia ka hangta.
Katkum ka khubor jong ka Law and Crime, katei ka nongtrei jong ka Regal Cinema, ka la iathuh ha ki bor pyniaid ba ka Merriex, ka i kumba ka bitar bha ia ka jingiam jong ka khun jongka. Ki la bynrap ba, ha kaba nyngkong, ka la mih shiphang-shiphang bad ka la duh ban pynleit jingmut ia katei ka phlim ‘Smurfs’ bad ka hap ban mih noh shabar ban pyn-en ia katei ka khun rit jongka, hynrei hadien, la iathuh ba ka la bthah ia ki para jongka, ba kin leh kumjuh. Bad haba ym shym la don ba lah ban pyn-en bad ban peit ia katei ka khyllung, katei ka kmie, ka la rai ban shu set-kut noh ia katei ka khyllung hapoh ka kali ba kan lait na ki jingjynjar baroh.
Katkum ka jingthoh jong ka jingshah kem jong ka Merriex, u tnga jongka, u la pynpaw ba katei ka longkmie kaba dang rit rta, ka don ka jingmlien ban shim ïa ki rai ki bym don jingmut kumno ban kiar na ka jingïam jong ka khun jong ki. U la kynnoh ruh ia ka, ba ka don ka jingbym lah shah haba iadei bad ka kam ri khyllung bad ba ka ju ud ruh haba iadei bad ka jingeh jong ki kynthei ban shim ia ka lyngkor ka jingkit kum ka kmie.
Kumta ki pulit ki la pynksan, ba ka jingieh-noh ia ki khyllung- khynnah khlem da don ki nongpeit hapoh ka kali, ka long kaba ym lah ban pdiang. Watla ki sngewnguh ba katei ka khyllung ka dang lait im, hynrei ki la maham jur ia baroh ki kmie ki kpa ban buh hakhmat eh ia ka jingbha- jingmiat jong ki khun ha man la ka por.
Ka Merriex, ka dang shah bat mynta hapoh ka patok jong ka Columbia County, ha ryngkat ka bai bah jamin kaba $50,000.
