Shillong, Naitung 27
Ka jingïakynduh lang jong ki Myntri ka tnat ïalehkai, Secretary Sports, ki nongmihkhmat na ki State Olympic Association jong ki jylla ka thaiñ shatei lammihngi hapoh ka lama jong ka North East Sports Association (NESA) ki la pynpaw ka jingkyrshan ïa ka jylla Meghalaya ka ban pynlong ïa ka 39th National Games ha u snem 2027.
Ïa kane la pynlong ha ka 25 tarik mynta u bnai ha State Convention Centre, Shillong, ha kaba ka la don ka jingïasyllok ruh bad u Myntri Rangbah ka Jylla u Conrad K. Sangma, uba la shah ai burom ha ki nongmihkhmat na ki State Olympic Association jong ka Arunachal Pradesh, Assam, Manipur, Mizoram, Meghalaya, Nagaland, Sikkim bad Tripura halor ka jinglah jong u ban ïohi jngai ha ka jingpynkhreh ïa ka Meghalaya ban pynlong ïa ka 39th National Games ha u snem 2027.
Ïa kane ka kynhun la lamkhmat da u Bah John F. Kharshiing, Wor-king President jong ka Meghalaya State Olympic Association (MSOA) bad uba long u Secretary General ka North East Sports Association (NESA). Ha katei ka jingïalang la sakhi lang ruh da u Kento Jini, Myntri ka tnat ïalehkai ka Arunachal Pradesh bad u A.T. Mondal, Myntri ka tnat bording ka Jylla
Shwa katei ka jingïalang, la pynlong ïa ka jingïalang ba nyngkong eh jong ki Myntri ka tnat ïalehkai, ki Secretary Sports bad ki nongmihkhmat na ki State Olympic Associations ka thaiñ shatei lammihngi ha Courtyard by Marriott, Shillong ha ka por 3 baje nohphai sngi, ban ïakren sani bha halor ka jingpynkhreh jong ka Meghalaya ban pynlong ïa ka 39th National Games.
Ïa kane ka jingïalang la pynïaid da u Bah Shakliar Warjri, Myntri ka tnat ïalehkai ka Jylla, ryngkat ka jingïadonlang u Kento Jini.
Ha katei ka jingïalang, u Bah Shakliar u la kyntu ïa baroh ki jylla ka thaiñ ban wan shakhmat ban ïatrei lang ban pynlong ïa kane ka National Games kaba khraw tam hapoh ka thaiñ shatei lammihngi hadien 20 snem. Ka Manipur ka la pynlong nyngkong ha u snem 1999 bad ka Assam ha u snem 2007. Hadien 12-15 snem eiei ka jylla Manipur bad Assam ki la lah ban sei ïa ki nongïalehkai shaduh ka Olympic.
U Dr. Vijay Kumar D, IAS, Commissioner & Secretary ka tnat ïalehkai, u la plie ïa kane ka jingïalang da ki kyntien maitphang ban pynshai bad pyntip ïa ka thong jong ka jingïalang. Ki nongmihkhmat na ki State Olympic Association bad ki heh sorkar na ki jylla bapher-bapher ki la ai ïa ka jingkren, jingsngew bad ka jingïaroh ïa ka jingthmu.
Kawei na ki mat ba kongsan tam ka long ka jingtyrwa na ka tnad ki kam pohïing jong ka Sorkar Pdeng, ba ki 7 tylli ki jylla ka thaiñ shatei lammihngi kin shim bynta da kaba pynlong kawei ka lympung ïalehkai ha ka 39th National Games, kum ka dak jong ka jingïatylli bad ka jingïatrei lang ha ka thaiñ.
