Shillong, Naitung 30
Ka Bayern Munich ha ka Sngi Balang ka la pyndep ban soi ïa u ‘rangïalehkai shakhmat u Luis Diaz na ka Liverpool kaba la rah ïa ka nam lahduh ha ka Premier League, ha ka jingsiew ka ban kiew sha 75 million euro ($86.5 million).
Une u ‘rangïalehkai shapdeng na Colombia uba la jop ïa ka Premier League, FA Cup bad ar tylli ki League Cup ha ka por ba u dang ïalehkai ha Anfield bad u la soi ïa ka jingïateh soskular bad ka kynhun ïalehkai jong ka Bundesliga ka ban kut haduh u snem 2029.
Ka bai lutksan ba la siew na ka bynta u Diaz, ka dei kaba lai bad heh tam ha ka histori jong ka Bayern.
“Ha u Luis Diaz, ngi la jop ban wanrah ïa uwei na ki ‘rangïalehkai ba tbit tam ha ka bynta shapdeng na ka Premier League,” ong u CEO ka Bayern, Jan-Christian Dreesen.
“U wanrah ïa ka jinglong nongïalehkai bashi-sha na ka Liverpool sha ka FC Bayern — u la jop ïa ka khusnam rupa bad kawei-pa-kawei ka klob jong u haduh mynta.”
U Diaz, uba don ha ka rta kaba 28 snem, u la ong ba u sngew kmen bha halor katei ka jingleit ïasoh sha katei ka klob jong ka Germany.
“Ka mut shibun ïa nga ban long shi bynta jong ka FC Bayern”, la pynpaw u Diaz. “Ki dei kawei na ki klob ba heh tam ha ka pyrthei. Nga kwah ban ïarap ïa ka kynhun thymmai jong nga ha ka rukom ïalehkai phutbol jong nga bad ka jinglong jong nga.”
“Ka thong jong nga ka long ban pynurlong ïa ka nam lahduh, bad kata ka dei kaba ngin trei man la ka sngi kum ka kynhun.”
Haba pynpaw sha ki lad pathai khubor, u Diaz u la ong ba un buh ïa ka thong ha Liverpool bad u la iehnoh da ka jingsngew sarong ïa baroh kaba ngi la lah ban ïatrei lang.”
Une u ‘rangïalehkai Colombia, uba la mih noh na Porto ha u Kyllalyngkot 2022, u la thep 13 kol na 17 tylli ki jingïalehkai ha ka Premier League, ha kaba u la pynkut kum u nongthep kol ba ar jong ka Liverpool hadien u Mohamed Salah.
