Guwahati, Naitung:
Naba ka jingkheiñ sngi ïa u snem ka pule-puthi ka la sdang, kito kiba thrang ban long doktor ki don ka lad ka kabu ksiar kaba shakhmat, namar ka P.A. Hospital (PIMC) kaba hap hapoh jong ka University of Science and Technology Meghalaya (USTM) ka la plie Admission na ka bynta ka prokram MBBS na ka bynta ka snem 2025-26.
La ithuh ïa ka PIMC ha shwa kum kawei na ki jaka pule doktor ba thymmai kaba don jingkyrmen bha ha ka thaiñ Shatei Mihngi jong ka ri India, mynta ka la pdiang ïa ki aplikeshon online katkum ka jingpynbna jong ka Directorate of Medical Education (DME), ka sorkar Meghalaya. La kyntu ïa ki briew kiba kwah ban ïa shim bynta ban apply lyngba ka official portal:www.meghealth.gov.in shwa ka por 12 baje mynsngi jong ka sngi Palei, 31 tarik, Naitung, 2025. Kumba la pynbeit, la ong ba ka jingïamir jingmut ha ka sien kaba nyngkong ka long naduh ka 1 tarik u Nailar, 2025 haduh ka 7 tarik u Nailar, 2025.
U Chancellor Mahbubul Hoque u la ïasam ïa ka jingthmu jong u na ka bynta kane ka jaka pule, da kaba ong: “Ka jingïaid lynti jong ngi ha ka koit ka khiah ka la sdang na ka Hospital jong ka University of Ayurveda & Naturopathy, ka jingthmu kaba pawnam ha ka pyrthei. Mynta, ha ryngkat ka PIMC, ngi la shim ka sienjam kaba kongsan ha kaba ïadei bad ka phang jong ka Medical Education, na ka bynta ban ïaid shakhmat ha ka ban sei ïa ki nongsumar hadien habud. Ngi la pyrkhat ba ka PIMC ka long kum ka jingïaid lynti ha ka pyrthei na ka bynta ka jingtbit ha ka kam sumar bad ka jinghikai.”
La plie bad sdang ïa ka PIMC ha u bnai Risaw, 2024, kane ka dei ka kolej ba kongsan jong ka USTM bad ka dang kiew stet kum ka jaka pdeng na ka bynta ka jinghikai ba thymmai ha ka liang ka koit ka khiah bad ka jingsumar ba pura ïa ki nongpang.
Da ki jingtei kiba mynta, ki nonghikai kiba la tbit bad kiba sngewrit, bad ka rukom hikai kaba pynleit jingmut ha baroh ar ka jinglong tynrai ha ka jingpule bad ka koit ka khiah jong ka imlang-sahlang, ka PIMC ka la sdang ban khring ïa ka jingsngewtynnad na kylleng ka ri.
Ka USTM hi ka bat ïa ka kyrdan kaba donburom ha ka pule puthi kaba kham shalor – ka dei tang ma ka ka skulbah shimet na ka thaiñ Shatei Mihngi jong ka ri India kaba la ïoh ïa ka jingithuh da ka ‘A’ Grade da ka NAAC ha ka jingpeit bniah kaba nyngkong, bad ka don hapdeng ki 200 tylli ki skulbah kiba ha khlieh duh ha India katkum ka NIRF 2024.
Na ka bynta kito kiba thmu ban rung na ka bynta ban ai jingsumar ban lah ban pynurlong pura ïa ka jingïakhun ha ka pyrthei jong ka koit ka khiah, ka PA Sangma International Medical College & Hospital ka la tyrwa ïa ka nongrim kaba skhem bad ka lawei kaba phyrnai.
