Tura, Nailar 10
Ki nongïalam barim ka ANVC bad ANVC-B ha ka Sngi U Blei ki la pynlong ïa ka jingïalang ba ïasnohlang ban ïashong pyrkhat halor ki kyndon kiba sahteng bad ki bym pat urlong jong ka Agreed Text for Settle-ment (ATS) kaba la ïasoi hapdeng ki artylli ki seng lehnoh bad ka Sorkar Pdeng lem bad ka Sorkar Jylla, ha ka 24 tarik u Nailur, 2014.
Kiba la donlang ha kane ka jingïalang nalor kiwei pat ki kynthup ïa u Chairman barim ka ANVC-B, u Bernard N. Marak bad u Publicity Secretary barim ka ANVC, u Vicky Rose N. Sangma.
Ha ka jingïalang kaba la long ha Tura, la ïakren bniah halor ka lynti ban ïaid shakhmat, khamtam haba ïadei bad ka ‘Para 12.1’ jong ka ATS, kaba bthah ba ka Centre Level Monitoring Committee kan lum jingïalang man ka hynriew bnai ban khmih bniah ïa ka jingïaid shaphrang jong ki kam ki jam.
Katkum ka jingong ki nongïalam barim jong ki ar seng, kam shym la don kaba kum kata ka jingïalang naduh u snem 2020 kaba pynkheiñ ïa ka nongrim jong ka jingïateh, bad ha kane ka jingïalang, la shim ïa ka rai ban phah shithi sha u Myntri ka tnad kam pohïing ka Sorkar Pdeng, u Amit Shah, halor kane ka mat.
Ka shithi sha u Myntri Sorkar Pdeng kan pynpaw ruh ïa ka jingdonkam kyrkieh ban pynlong ïa ki jingïalang jong ka Centre Level Monitoring Committee, ki lad ki lynti kiba skhem kiba donkam ban shim na bynta ban pynneh-pynsah ïa ka snap kolshor ba kyrpang bad ka jingpynkupbor ïa ki nongshong shnong, ka jingwanrah ïa ka lad pynmih pisa kaba treikam bad ki shlem ha ka kyrdan jong ki shnong, ka jingai jingmut na bynta ka jingmang pisa kaba kham heh sha ka GHADC, ban thaw ïa ka kynhun laitluid ban khmih ïa ka pisa-tyngka bad ki jingwanrah jingkylla ha ka Riti Synshar bad ka jingkyrshan pisa ba tang shisien na bynta ki Traditional Institution (ka kular ka bym pat shym la urlong).
Ha kane ka shithi la kyrpad ruh ban pyllait noh kloi ïa ka pisa sha ka GHADC katkum ki ‘para’ ba ïadei jong ka ATS, ka jingai jingïarap pisa ba shisien kaba T.252,01,00,000/-, ki projek pynroi kiba ïadei bad ki jaka khlaw kiba kot T.308,14,27,382/-, ki jingtei nongkyndong bad ka jingkyntiew ïa ka rep ka riang kaba kot sha ka T.104,34 klur, (T.664,49,27,382 baroh).
“Lada ka Sorkar Pdeng ka pynkloi ha ka ban pyllait ïa kane ka pisa ba la mang, ki nongtrei ka GHADC kin ïoh pdiang ïa baroh ka tulop ba dang sahteng, bad ki kam pynroi kiba kongsan kin ïaid shakhmat khlem ka jingpynslem. Kumta ngi kyrpad jur ïa ka jingtuklar jong phi ban pyntikna ba la burom ïa ki jingkular ba la shon ha ka ATS (in letter and spirit),” ong ka shithi.
