Shillong, Nailar 11
Ka Committee on Government Assurances jong ka ïingdorbar thawaiñ ka Jylla ha ka sngi Nyngkong ka la leit ban jurip kyrpang ïa ki jaka trei-kam kiba don ha Ri-Bhoi District, kaba kynthup ïa ki bynta kiba kongsan ha ka karkhana bad ka rep ka riang.
Ha kane ka jingjurip, ki dkhot ka komiti ki la leit peit ïa ka Poultry Feed Manufacturing Unit bad ka RNB Cement Plant Ltd. ha ka Umiam Industrial Area, kumjuh ruh ïa ka Government Poultry Farm ha Kyrdemkulai.
Ïa kane ka komiti la ïalam da u Bah Renikton Lyngdoh Tongkhar, MLA, ha ryngkat ka jingdon lang jong ki dkhot kat u Dr. Celestine Lyngdoh, u Bah Matthew B Kurbah bad u Bah Ollan Singh Suin, kiba dei ki MLA.
Haba kren hadien ka jingjurip, u Chairman ka komiti Bah Renikton Lyngdoh Tongkhar u la ong, “Ngi la sdang ïa ka jingleit jurip mynta ka step ha Umïam, ha kaba ngi la leit peit ïa ka Poultry Feed Manufacturing Unit bad ka RNB Cement Plant ha Umiam Industrial Area. Hadien kata, ngi la leit ruh sha ka Government Poultry Farm ha Kyrdemkulai. Ngi sngewkmen ban ïohi ba ka jingpynïaid bad ka rukom sumar ïa ka Government Poultry Farm ka long kumjuh bad ki farm shimet jong ki paidbah. Ka Poultry Feed Manufacturing Unit ka la trei ïa ka kam la bun snem bad ka la long ka jingkyrkhu ban ïohi ba ka farm Sorkar ruh ka ïai bat ïa ka jingkyntiew bad jingbha la bun snem.”
“Kane ka farm ka don ka lad ban pynmih shuh shuh ïa ki nongrep bad ki nongpynïaid kam lajong da kaba ai jinghikai ïa ki samla, khamtam ïa kito ki samla ba la pule kiba ym lah ban ïoh kam Sorkar. Ka rep ka riang ka don ka lad bad jingdawa kaba khraw ha ka jylla, kumta ngi kyntu ïa ki samla ba kin shim ïa kane kum ka jingim kaba biang. Ngi kyntu ruh na tnat ri jingri ba kan pyrkhat ban pynheh shuh shuh ïa kane ka farm, ym tang ban pyndap ïa ka jingdawa, hynrei ruh ban thaw ïa ki lad kamai kajih shuh shuh. Ka rukom sumar bad pynïaid ïa ka farm ka long kaba sngewkmen bad ngi kyrmen ba kane kan ïai bteng,” la ong u Bah Renikton.
Ki doktor bad ki ophisar na ka tnat ri jingri, ryngkat bad ki nongtrei na ka ïingdorbar thawaiñ ka Meghalaya, ki la donlang ha kane ka jingjurip.
