Jowai, Nailar 17
Ka kynhun ki runar na ka jaidbynriew Muslim kiba don haduh 25-30 ngut la kynnoh ba kila thombor ïa ki Khasi ha ka shnong Kalakhal Khasi Punji, Cachar, Assam ha kaba ar ngut kila mynsaw jur.
Kane ka jingjia kala jia ha ka 15 tarik Nailar ha ka por kumba 9 lane 10 baje mynstep ha ka por ba ki Khasi ki leit sha ka bri tympew jong ki.
Katkum ka FIR ba la ujor ha thanad Kachudaram da ka Kong Sibil Suchiang, ka kurim jong u Raju Kasar, la ong ba u lok jong ka ryngkat bad ki para nongshong shnong u Bikas Syngkor, u Adison Kasar, u Annias Rasmut, u Wiki Pohom, bad u Starly Lamin ki la leit sha ka bri kumba ju long.
Hynrei kynsan kynsan, kane ka kynhun jong ki jaidbynriew Muslim kiba tip kum ki Muslim Mia Community kiba ithuh kum u Salim, u Loti, u Kalamia, u Nur, u Mintu, u Abimulla, u Abdul Rehman, u Rosit Ali, u Kalu Mia, u Sahid Ahmed Mazumdar, u Bablu, u Sharul, u Lekai, u Amir San, bad u Alta Hussain Loskor, la kynnoh ba kila kam trai ïa katei ka jaka rep bad beh ïa ki bad ha kajuh ka por kila thombor ïa ki Khasi ba don ha katei ka jaka rep.
La ïathuh ruh ba ki nongthombor ki la pyndonkam da ki wait, ki tiar kiba nep bad ki suloi shna hi.
Ha kane ka jingjia, u Raju Kasar bad u Bikas Syngkor ki la mynsaw jur da ka jingshah mait bad mynta ki dang shah sumar ha Silchar Medical College and Hospital (SMCH). U Raju Kasar u la mynsaw jur na ka kti da ka jingshah pom.
La ïathuh ba kine khar Muslim ki dei kiba mlien ha ki kam sniew naduh ka kam khaïi drok, kynja, tuh dieng bad kiwei kiwei ki kam beaiñ.
Kine ki Muslim kila byrngem ruh ban thang ïa ka shnong Khasi Kalakhal Part-I bad ki la maham ba kin thombor ïa ki khynnah kynthei ha ka por ba ki leit skul da kaba rahbor bad leh beijot.
Kane ka jingmaham jong kine ki runar kala pynrit mynsiem ïa ki nongshong shnong ka Kalakhal bad kyntu ïa ki bor pulit ban pynshitom mardor ïa kine ki runar ban shngaiñ ki nongshong shnong.
Halor kane ka jingjia na ka liang ka seng Barak Valley Khasi-Jaiñtia Welfare Organisation (BVKJWO-CB), Assam bad Khasi Student Union, Assam kiba peit ïa ka bha ka miat ki jaidbynriew Khasi-Pnar ha Assam kila tuklar halor kane ka jingjia ban dawa na ka bor ka aiñ ban kem bad pynshitom mardor ïa kine ki runar.
Kila ong ruh ba lada dawa ban mih madan ruh kin mih madan ban pynioh ïa ka jingbishar ïa kine ki lanot.
