Shillong, Nailar 18
Ka lahduh jong u snem ba la lah, ka NorthEast United FC ka la khmih lynti ban rung biang sa shisien sha ka final ha ka Durand Cup ha kaba kan ïakhun pyrshah ïa ka Shillong Lajong FC ha ka semi-final ka ban long ha ka sngi Ba-ar ha JN Stadium, Polo ha ka por 7 baje janmiet.
Kane ka long ka jingïai bteng na ka jingïalehkai semi final jong u snem ba la lah, ha kaba ka NEUFC ka la jop da 3-0 kol hashwa ba kan ïohpdang ïa ka trophy nam lahduh. Kumjuh ha ka jingïalehkai jong ka Group-E mynta u snem, ka NorthEast United ka la jop da 2-1 kol ïa ka Lajong ha kaba u Alaaeddine Ajaraie u la thep ar kol.
Hynrei shi sngi hashwa ban ïakhun ïa ka semi final, u coach ka NorthEast United, u Juan Pedro Benali u la ban jur ba ki jingïakynduh ba la dep kin ym don kano kano ka jingktah ïa ka semi final.
“Ka dei ka jingïalehkai derby bad kan long kaba eh na ka bynta baroh ar tylli ki kynhun. Ngi ïatip bha iwei ïa iwei. Ka jingïalehkai jong u snem ba la dep bad wat ka jingïalehkai group ki la dep. Mynta ka dei ka semi final kaba long ka jingkhang sha ka phainal. Baroh ar tylli ki kynhun kin ïakhun pyrshah ban khur ïa ka jingjop,” la bynrap u Benali.
Kumjuh u kapten ka NEUFC u Michel Zabaco, uba la ïalam ïa ka kynhun ban rah ïa ka nam lahduh ha u snem ba la lah, u la pynpaw ba kum ka kynhun ka burom ïa ka liang pyrshah, hynrei kum ka kynhun ka pynleit jingmut na ka bynta ban khur ïa ka jingjop.
“Ngi sngew sarong ban don hangne ha ka jingïakhun semi final, hynrei ngi kwah ban jop pyrshah ïa ka Shillong Lajong. Man ka por ba ngi ïakhun ïa ki, ngi hap ban aiti lut, bad mynta ka kynti kan ym long kaba pher,” la bynrap u Zabaco.
Haba phai sha u coach ka Shillong Lajong u Birendra Thapa u la pynpaw, “Ka jingïakhun semi final ka long kaba kongsan bad ka pyni ba ka jingtrei shitom jong ngi baroh ka la sei soh. Ka dei ka jingialehkai kaba eh bha na ka bynta baroh arliang mamla ha kane ka semi final. Ngi la ïakhun pyrshah ïa ka Northeast ha u snem ba la lah bad ngi la shah rem ar sien mynta u snem, hynrei kane ka jingïalehkai kan long kaba kham pher.”
